- 2015-10-01 15:24:57
- ព័ត៌មាន
ពាណិជ្ជកម្មអេឡិចត្រូូនិកនិងទូរគមនាគមន៍ ជំនាញថ្មីពីរបណ្តុះត្រូវទីផ្សារការងារ
- 2015-10-01 15:24:57
- ចំនួនមតិ 0 | ចំនួនចែករំលែក 0
ពាណិជ្ជកម្មអេឡិចត្រូូនិកនិងទូរគមនាគមន៍ ជំនាញថ្មីពីរបណ្តុះត្រូវទីផ្សារការងារ
ចន្លោះមិនឃើញ
ដោយមើលឃើញពីការរីកចម្រើនផ្នែកបច្ចេកវិទ្យាព័ត៌មានវិទ្យាក្នុងប្រទេសកម្ពុជាកាន់តែមានការអភិវឌ្ឍន៍ វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មានហៅកាត់ NIPTICT បានដាក់បញ្ចូលជំនាញបច្ចេកវិទ្យាថ្មីចំនួនពីរ ដែលសិស្សនិស្សិតអាចជ្រើសរើសសិក្សា។ ជំនាញថ្មីទាំងពីរនេះមាន "ពាណិជ្ជកម្មអេឡិចត្រូនិក និងភស្តុភារ (E-commerce & Logistics)” និង "ទូរគមនាគមន៍ និងបណ្ដាញកុំព្យូទ័រ (Telecoms & Networking)” ដែលជំនាញទាំងពីរនេះពុំទាន់មាននៅក្នុងកម្មវិធីសិក្សារបស់វិទ្យាស្ថានឬសាកលវិទ្យាល័យបច្ចេកវិទ្យាល្បីៗណាមួយក្នុងប្រទេសកម្ពុជានៅឡើយទេ។
លោក សេង សុភាព ប្រធានវិទ្យាស្ថានជាតិ NIPTICT
ថ្លែងក្នុងសិក្ខាសាលាពិគ្រោះយោបល់ ស្តីពីការរៀបចំកម្មវិធីសិក្សាបរិញ្ញាបត្រ វិទ្យាសាស្ត្រកុំព្យូទ័រនៅក្រសួងប្រៃសណីយ៍ លោក សេង សុភាព ប្រធានវិទ្យាស្ថានជាតិ NIPTICT បានឲ្យដឹងថា ជំនាញ E-commerce & Logistics និង Telecoms & Networking ជាជំនាញថ្មីមិនទាន់មានសាលាក្នុងស្រុកណាបើកបណ្តុះបណ្តាលដល់និស្សិតនៅឡើយទេ។
លោកថា ជំនាញទាំងពីរនេះថ្មីនិងប្លែកកំពុងមានសក្តានុពលនិងតម្រូវការទីផ្សារការងារខ្ពស់។
សេវាកម្មពាណិជ្ជកម្មអនឡាញកំពុងរីកដូចផ្សិតដូចជា ការបង្កើតវិបសាយលក់ទំនិញអនឡាញជាដើម។ ការបង្កើតជំនាញ E-commerce & Logistics នឹងអាចបំពេញកង្វះខាតនិងអាចឆ្លើយតបតាមតម្រូវការទីផ្សារទាំងអស់នេះ។
លោក សេង សុភាពបន្តថា និស្សិតដែលរៀនចប់ជំនាញ E-commerce & Logistics ពួកគេអាចក្លាយជា អ្នកគ្រប់គ្រងក្រុមហ៊ុនលក់ទំនិញអនឡាញឬក្លាយជាអ្នកបង្កើតវិបសាយលក់ទំនិញអនឡាញធំៗ ស្រដៀងគ្នានឹង Amazon និង E-bay។ លើសពីនេះនិស្សិតទាំងអស់ដែលរៀនជំនាញនេះ នឹងយល់ដឹងច្បាស់ពីរបៀបក្នុងការគ្រប់គ្រងក៏ដូចជាធ្វើអាជីវកម្មអនឡាញ ដើម្បីប្រកួតប្រជែងជាមួយនឹងក្រុមហ៊ុនលក់ទំនិញអនឡាញធំៗក្នុងស្រុកផ្សេងទៀតបានដោយជោគជ័យ។
ចំណែកឯ Telecoms & Networking ជាជំនាញថ្មីមួយទៀតដែលវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មានបើកបណ្តុះបណ្តាលដល់និស្សិតសិក្សា។ និស្សិតដែលសិក្សាជំនាញនេះនឹងយល់ច្បាស់ពីដំណើរការនៃប្រព័ន្ធអ៊ីនធឺណិតយ៉ាងទូលំទូលាយ អាចគ្រប់គ្រង System មានជំនាញតបណ្ដាញ Fiber Optics និងធ្វើយ៉ាងណាឱ្យបណ្ដាញ Netwok និងអ៊ីនធឺណិតទាំងអស់ ដំណើរការបានរលូននិងមានសុវត្ថិភាពខ្ពស់៕
អត្ថបទ៖ ប៉ែត ផាន់និត