- 2015-07-13 17:54:44
- ព័ត៌មាន
Ford Mustang បង្ហាញខ្លួនជាថ្មី ក្រោយបាត់មុខជាង ៥០ ឆ្នាំ
- 2015-07-13 17:54:44
- ចំនួនមតិ 0 | ចំនួនចែករំលែក 0
Ford Mustang បង្ហាញខ្លួនជាថ្មី ក្រោយបាត់មុខជាង ៥០ ឆ្នាំ
ចន្លោះមិនឃើញ
Ford Mustang រថយន្តដ៏ល្បីឈ្មោះ និងជារថយន្តតំណាងវប្បធម៌របស់អាមេរិក ដែលពលរដ្ឋកម្ពុជាមួយចំនួនធ្លាប់ឃើញកាលពីរយៈពេល ៥០ ឆ្នាំមុន ឥឡូវបានបង្ហាញវត្តមានសាជាថ្មីនៅប្រទេសកម្ពុជាតាមរយៈក្រុមហ៊ុន RMA ដែលបាននាំចូលរថយន្តប្រភេទនេះនិងធ្វើសម្ពោធលក់ជាផ្លូវការកាលពីចុងសប្ដាហ៍មុន។
Ford Mustang ដែលក្រុមហ៊ុន RMA នាំចូលជារថយន្តជំនាន់ទី ៦ ដែលមានការរចនារូបរាងកាន់តែប្លែក និងទាក់ទាញជាងជំនាន់មុន។ រថយន្តប្រភេទស្ព័រ Ford Mustang ត្រូវគេធ្វើទំនើបកម្មលើការរចនារូបរាង រួមទាំងបច្ចេកវិទ្យា ជាមួយជម្រើសម៉ាស៊ីនពីរប្រភេទគឺ 5.0L-V8 turbocharged និង 2.3-liter EcoBoost។
ឯកឧត្តមខៀវ កាញារីទ្ធ រដ្ឋមន្រ្តីក្រសួងព័ត៌មានបានថ្លែងការចាប់អារម្មណ៍សម្រាប់ការលេចមុខជាថ្មីរបស់ Ford Mustang ដែលនឹងជួយរំលឹកឡើងវិញពីភាពល្បីល្បាញនៃរថយន្តនេះ ដែលធ្លាប់មានកេរ្តិ៍ឈ្មោះនិងការកោតសរសើរក្នុងចំណោមពលរដ្ឋកម្ពុជាកាលពីអតីតកាល។
ចំណែកលោកស្រី ជូលី ជុង ភារៈធារីស្ថានទូតអាមេរិកប្រចាំនៅប្រទេសកម្ពុជា បានសំដែងមោទនភាពដែលរថយន្តដ៏ល្បីជាវប្បធម៌របស់អាមេរិកនេះ ត្រូវបានគាំទ្រពីពលរដ្ឋកម្ពុជា។ លោកស្រីសង្ឃឹមថា តាមរយៈ Ford Mustang នឹងជួយធ្វើឲ្យទំនាក់ទំនងរវាងអាមេរិកនិងកម្ពុជាកាន់តែប្រសើរឡើង។
Ford Mustang ជំនាន់ថ្មីនេះក្រៅពីការអភិវឌ្ឍរូបរាងដ៏ស្រស់ឆើត ក៏បាននាំជាមួយបច្ចេកវិទ្យាថ្មីៗដូចជា SYNC 2 ដែលអាចភ្ជាប់ការកម្សាន្តពីទូរសព្ទដៃរបស់អ្នកបើកបរជាមួយរថយន្ត, បច្ចេកវិទ្យា Mykey ជួយក្រើនរំលឹកដល់អ្នកបើកបរឲ្យមានការប្រុងប្រយ័ត្នដូចជាការពាក់ ខ្សែក្រវាត់សុវត្ថិភាព និងការកំណត់ល្បឿនបើកបរជាដើម។ រថយន្តនេះក៏បានបំពាក់ពោងសុវត្ថិភាពចំនួន ៥ សម្រាប់អ្នកបើកបរនិងអ្នករួមដំណើរ រួមទាំងបច្ចេកវិទ្យាដែលអាចផ្តល់ដំណឹងពេលឡានអាចប្រឈមការប៉ះទង្គិច។
លោក ងន សាំង អគ្គនាយកក្រុមហ៊ុន RMA មានការរំពឹងសម្រាប់ការលក់ Ford Mustang នៅទីផ្សារកម្ពុជា ដោយក្រុមហ៊ុនរបស់លោកគ្រោងលក់រថយន្តនេះឲ្យបានពី ២០ ទៅ ៣០ គ្រឿងក្នុងឆ្នាំ ២០១៥ នេះ។
Ford Mustang ដែលក្រុមហ៊ុនដាក់លក់ក្នុងតម្លៃមួយគ្រឿងមិនក្រោម ៨ ម៉ឺនដុល្លារនោះទេ៕
បន្តអាន៖ ទូតសុច្ឆន្ទៈយីហោរថយន្តប្រណិត Jaguar Land Rover ជានរណា?
បន្តអាន៖ ក្តារចុចល្អស្រួលប្រើ ប្រិយមិត្តណាដឹងជួយណែនាំផង
អត្ថបទ៖ ប៊ុណ្ណារ៉ា