- 2020-04-09 07:10:21
- ព័ត៌មាន
លោក Bill Gates ព្យាករណ៍អំពីជំងឺកូវីដ១៩ លើកនេះមានដំណឹងល្អ និងមិនល្អ
- 2020-04-09 07:10:21
- ចំនួនមតិ 0 | ចំនួនចែករំលែក 0
លោក Bill Gates ព្យាករណ៍អំពីជំងឺកូវីដ១៩ លើកនេះមានដំណឹងល្អ និងមិនល្អ
ចន្លោះមិនឃើញ
មហាសេដ្ឋី Bill Gates សហស្ថាបនិក Microsoft ធ្លាប់បានព្រមានពិភពលោកកាលពី ៥ឆ្នាំមុន អំពីជំងឺរាតត្បាតដែលនឹងចូលមកដល់ ហើយនៅថ្ងៃពុធនេះលោកបានព្យាករណ៍អំពីជំងឺកូវីដ១៩ ដែលមានដំណឹងល្អផង និងមិនល្អផង។
ដំណឹងមិនល្អនោះគឺត្រូវចាំរហូតដល់អំឡុងខែកញ្ញាឆ្នាំ ២០២១ ទើបមានវ៉ាក់សាំងការពារជំងឺកូវីដ១៩ដ៏មានប្រសិទ្ធភាព ហើយសហរដ្ឋអាមេរិកនឹងអាចបញ្ឈប់ការតម្រូវឲ្យពលរដ្ឋស្ថិតនៅដាច់ដោយឡែកពីគ្នានៅត្រឹមចុងខែឧសភាឆ្នាំនេះ។
លោក Bill Gates បានប៉ាន់ស្មានលើរយៈពេល ១៨ ខែនៃការបញ្ចេញវ៉ាក់សាំងមានប្រសិទ្ធភាព ដោយបានសន្មតថាវ៉ាក់សាំងត្រូវបានផលិតក្នុងល្បឿនលឿនពេញទីមួយ។ វ៉ាក់សាំង ១០ ក្នុងចំណោមវ៉ាក់សាំងប្រហែល ១០០ ដែលកំពុងផលិត គឺមានសង្ឃឹមជោគជ័យខ្ពស់។ នេះបើតាមការលើកឡើងរបស់លោក Bill Gates ក្នុង Live Chat កាលពីថ្ងៃពុធ លើបណ្ដាញ LinkedIn។
នៅពេលដែលសហរដ្ឋអាមេរិកអាចគ្រប់គ្រងស្ថានភាពកូវីដ១៩បាន ក្នុងចន្លោះខែមេសា ទៅខែឧសភា មហាសេដ្ឋីរូបនេះយល់ថា ការងារដូចជាការបើកដំណើររោងចក្រ, ការងារវិស្វកម្ម, ការវិលត្រឡប់ចូលរៀនវិញគឺនឹងអាចធ្វើទៅបាន។ ប៉ុន្តែកម្មវិធីជួបជុំធំៗដូចជាកម្មវិធីកីឡា ទំនងជាមិនអាចប្រព្រឹត្តទៅបាននោះទេ លុះត្រាតែមានមនុស្សច្រើនបានទទួលវ៉ាក់សាំង។
អ្វីដែលជាដំណឹងល្អនោះទេ បើតាមលោក Bill Gates ពិភពលោកទំនងជានឹងមិនជួបប្រទះជំងឺឆ្លងធំបែបនេះម្ដងទៀតនោះទេបន្ទាប់ពីកូវីដ១៩ ដោយសារវាបានក្លាយជាមេរៀនមួយអំពីការធ្វើតេស្តរកមេរោគ និងការត្រួតពិនិត្យឲ្យបានដិតដល់ ហើយដំណោះស្រាយសុខាភិបាលកម្រិតអន្តរជាតិដែលធ្វើឡើងដើម្បីឆ្លើយតបនឹងវិបត្តិនាពេលនេះ នឹងអាចទប់ស្កាត់ជំងឺឆ្លងនាពេលអនាគតមិនឲ្យរីករាលដាលដល់កម្រិតសកលលោក និងធ្ងន់ធ្ងរដូចបច្ចុប្បន្ននេះឡើយ៕
