- 2020-03-16 02:16:03
- ព័ត៌មាន
មើលលក្ខណៈសម្បត្តិ Huawei P40 Pro PE អាចឲ្យគូប្រជែងភ័យព្រួយអត់?
- 2020-03-16 02:16:03
- ចំនួនមតិ 0 | ចំនួនចែករំលែក 0
មើលលក្ខណៈសម្បត្តិ Huawei P40 Pro PE អាចឲ្យគូប្រជែងភ័យព្រួយអត់?
ចន្លោះមិនឃើញ
Huawei គ្រោងប្រកាសចេញស្មាតហ្វូនកំពូលចំនួនបីនៅចុងខែមីនានេះ។ ម៉ូដែលដែលគេចាប់អារម្មណ៍ខ្លាំងបំផុតគឺ Huawei P40 Pro Premium Edition ដែលរំពឹងថាជាគូប្រជែងខ្លាំងក្លាមួយរបស់ Galaxy S20 Ultra។
វិបសាយចិន IT Home អាចទទួលបានព័ត៌មានអំពីតម្លៃ លក្ខណៈសម្បត្តិ និងមានភ្ជាប់ជាមួយរូបភាព Render របស់ P40 Pro Premium Edition ផងដែរ។
ដំបូងគឺនិយាយអំពីអេក្រង់ ដែលមានបំពាក់អេក្រង់ទំហំ ៦,៧ អ៊ីញ ប្រភេទ OLED អាចបង្ហាញរូបភាពកម្រិត 3160x1440 ភីកសែល និងមាន Refresh Rate 120Hz។ ដើម្បីឲ្យស្មាតហ្វូននេះកាន់តែប្លែកពីគេ Huawei បានបង្កើតនូវផ្ទាំងកញ្ចក់ដែលមានរាងកោងទាំងបួនជ្រុង កោងទាំងលើទាំងក្រោម និងផ្នែកសងខាងនៃអេក្រង់។
នៅផ្នែកខាងក្រោយវិញគឺមានបំពាក់ស៊ុមកាមេរ៉ាទំហំធំ ដែលមានបំពាក់ Sensor ចំនួនប្រាំ។ កាមេរ៉ាមេមានទំហំ ៥២ MP, ភ្ជាប់នឹងកាមេរ៉ា Ultra-Wide ទំហំ ៤០MP, មានកាមេរ៉ា Telephoto ទំហំ ៨MP ដែលអាច Zoom Optical បាន ៣ដង, មាន Sensor 3D ToF ដែលជួយឲ្យរូបភាព Portrait កាន់តែស្អាត និងចុងក្រោយមានកាមេរ៉ាប្រភេទ Periscope ដែលជំនួយដល់ការ Zoom ប៉ុន្តែលក្ខណៈសម្បត្តិរបស់វាមិនមានការបញ្ជាក់លម្អិតឡើយ។
ចំពោះកាមេរ៉ា Selfie គឺ Huawei បានបំពាក់ប្រព័ន្ធកាមេរ៉ាភ្លោះដែលកាមេរ៉ាមេមានទំហំ ៣២MP អមជាមួយកាមេរ៉ាប្រភេទ Ultra-Wide ទំហំ ៣២MP មួយទៀតសម្រាប់ថតរូបជាក្រុម។ បន្ថែមពីនេះមានបំពាក់ Sensor ToF ដែលធ្វើឲ្យការស្កេនមុខដើម្បីដោះសោមានសមត្ថភាពកាន់តែខ្លាំងក្លា។
នៅផ្នែកខាងក្នុងរបស់ P40 Pro Premium Edition ក៏គួរចាប់អារម្មណ៍ខ្លាំងដែរ។ វាមានបំពាក់ឈីប Kirin 990 5G ដែលអាចទ្រាំទ្រសេវា 5G ភ្ជាប់ជាមួយ RAM ទំហំ ១២GB និងអង្គផ្ទុកទំហំ ៥១២GB ដែលប្រហែលជាអាចពង្រីកទំហំតាមរយៈមេមូរីកាត។
ស្មាតហ្វូននេះនឹងប្រើប្រាស់ប្រព័ន្ធប្រតិបត្តិការ Android 10 ជាមួយ EMUI 10 ប៉ុន្តែវានឹងមិនមានសេវាកម្ម Google នោះទេ។ អ្នកប្រើប្រាស់នឹងត្រូវពឹងផ្អែកលើ App Gallery របស់ Huawei ជំនួសវិញ។
សម្រាប់ថ្មវិញ Huawei បានបំពាក់ទំហំដល់ ៥៥០០ mAh ចូលទៅក្នុង P40 Pro Premium Edition។ អ្វីដែលពិសេសគឺទ្រាំទ្រការសាកថ្មល្បឿន ៥០ វ៉ាត់ និងអាចសាកថ្មដោយមិនប្រើខ្សែក្នុងល្បឿន ២៧ វ៉ាត់ផងដែរ។
P40 Pro Premium Edition នឹងបង្ហាញមុខជាផ្លូវការនាថ្ងៃទី ២៦ ខែមីនា តាមរយៈកម្មវិធីប្រកាសលើអនឡាញ ដែលបង្ហាញមុខព្រមគ្នាជាមួយ Huawei P40 និង Huawei P40 Pro។ ការចេញលក់រំពឹងថាចាប់ផ្ដើមនាដើមខែមេសា ហើយតម្លៃរបស់វានៅអឺរ៉ុប អាចមានចន្លោះពី ១១៩៩ ទៅ ១២៩៩ អឺរ៉ូ (ប្រមាណ ១៣៣១ ទៅ ១៤៤២ ដុល្លារ)៕