- 2019-11-23 05:05:30
- ព័ត៌មាន
វាដល់ពេលដែលត្រូវដាក់ដំណើរការ 5G ហើយ
- 2019-11-23 05:05:30
- ចំនួនមតិ 0 | ចំនួនចែករំលែក 0
វាដល់ពេលដែលត្រូវដាក់ដំណើរការ 5G ហើយ
ចន្លោះមិនឃើញ
នៅថ្ងៃទី២០-២១ ខែវិច្ឆិកា ឆ្នាំ២០១៩ នាសណ្ឋាគារកាំបូឌីយ៉ាណា អង្គការអភិវឌ្ឍន៍ឧស្សាហកម្មរបស់អង្គការសហប្រជាជាតិ (UNIDO) សហការជាមួយក្រសួងឧស្សាហកម្ម និងសិប្បកម្មនៃព្រះរាជាណាចក្រកម្ពុជា បានរៀបចំសិក្ខាសាលាមួយស្ដីពី ឌីជីថលនីយកម្ម និងបដិវត្តន៍ឧស្សាហកម្មជំនាន់ទី៤ ក្នុងគោលដៅបង្ហាញអ្នកធ្វើគោលនយោបាយអំពីនិន្នាការបច្ចុប្បន្ន និងគោលនយោបាយថ្មីទាក់ទងទៅនឹងបញ្ហាប្រឈម និងឱកាសពីបដិវត្តន៍ឧស្សាហកម្មជំនាន់ទី ៤ (4IR)។
ដោយផ្តោតលើការធ្វើបច្ចុប្បន្នភាពដល់អ្នកបង្កើតគោលនយោបាយ អំពីនិន្នាការចុងក្រោយបំផុតនៅក្នុងបដិវត្តន៍ឧស្សាហកម្មជំនាន់ទី ៤ (4IR) សិក្ខាសាលានេះបានរៀបចំឱ្យមានការពិភាក្សាជាក្រុមដោយមានការចូលរួមពីសំណាក់ឯកឧត្តម សារុន រិទ្ធា រដ្ឋលេខាធិការក្រសួងឧស្សាហកម្ម និងសិប្បកម្មនៃប្រទេសកម្ពុជា បណ្ឌិត Pichet Durongkaveroj អតីតរដ្ឋមន្រ្តីក្រសួងសេដ្ឋកិច្ចឌីជីថល និងសង្គមនៃប្រទេសថៃ បណ្ឌិត Sanghoon KIM សមាជិកស្រាវជ្រាវនៅវិទ្យាស្ថានកូរ៉េ KIET និងជាទីប្រឹក្សារដ្ឋមន្រ្តីក្រសួងពាណិជ្ជកម្ម ឧស្សាហកម្ម និងថាមពល (MoTIE) ប្រទេសកូរ៉េខាងត្បូង និងតំណាងមកពីវិស័យឯកជន គឺលោក Victor Zhang នាយកបច្ចេកទេស (CTO) នៃក្រុមហ៊ុន Huawei Cambodia & Laos។
លោក Victor Zhang បានបញ្ជាក់ថា ប្រទេសកម្ពុជាអំពាវនាវឱ្យមានបច្ចេកវិទ្យា 5G ហើយឥឡូវនេះ វាដល់ពេលដែលត្រូវចាប់ផ្ដើមដាក់ឲ្យដំណើរការ 5G ដើម្បីជាហេដ្ឋារចនាសម្ព័ន្ធដ៏សំខាន់នៃបច្ចេកវិទ្យាទំនាក់ទំនងព័ត៌មានវិទ្យា ICT ដើម្បីអាចសម្រេចបាននូវគោលដៅ នៃបដិវត្តន៍ឧស្សាហកម្មជំនាន់ទី៤ (4IR) ។
លោក Victor មានប្រសាសន៍នៅក្នុងកិច្ចពិភាក្សាយ៉ាងដូច្នេះថា «ឆ្នាំ២០២០ នឹងក្លាយជាគោលដៅដ៏សំខាន់មួយនៅក្នុងប្រវត្តិសាស្រ្តបច្ចេកវិទ្យាទំនាក់ទំនងព័ត៌មានវិទ្យា (ICT) ព្រោះវាជាឆ្នាំដែលកត់សម្គាល់ពីការចាប់ផ្តើមនៃភាពទូលំទូលាយនៃការប្រើប្រាស់ជាផ្លូវការនៃបច្ចេកវិទ្យា 5G ។ ប្រសិនបើយើងក្រឡេកទៅមើលបច្ចេកវិទ្យា 2G, 3G, 4G យើងអាចនិយាយបានថា បច្ចេកវិទ្យាទាំងនោះ ភាគច្រើនគឺជាការតភ្ជាប់ទំនាក់ទំនងរវាងមនុស្ស។ ចំណែកឯនៅក្នុងយុគសម័យ 5G វិញ វាមានលទ្ធភាពតភ្ជាប់អ្វីៗគ្រប់សព្វបែបយ៉ាង ដោយបើកចំហរាល់ការសហការគ្នានៅក្នុងវិស័យឧស្សាហកម្មជាច្រើន។ ខណៈដែលយើងកំពុងនិយាយអំពី IR4.0 យើងក៏ចាំបាច់និយាយពី IABC (IoT, AI, Big Data, Cloud) និង 5G ផងដែរ ដែលវាក៏ជាហេដ្ឋារចនាសម្ព័ន្ធ ICT ដ៏សំខាន់មិនអាចខ្វះបាន និងជាមូលដ្ឋានគ្រឹះដ៏សំខាន់សម្រាប់ការធ្វើឌីជីថលនីយកម្ម។ បើគ្មាន 5G នោះរាល់កម្មវិធីដែលបានរៀបរាប់ខាងលើគឺមិនអាចមានបានដែរ។»
លោកបន្ថែមទៀតថា «យើងមានមោទកភាពណាស់ដែលបានឃើញប្រទេសកម្ពុជា បានដាក់ឲ្យដំណើរការបច្ចេកវិទ្យា 4G របស់ខ្លួនកាលពីឆ្នាំ២០១២ ហើយបានជាប់ចំណាត់ថ្នាក់លេខ២ ក្នុងតំបន់អាស៊ាន ខណៈពេលដែលយើងនៅយឺតបន្តិចចំពោះបច្ចេកទេស 5G។ ការធ្វើឲ្យចក្ខុវិស័យឌីជីថលឲ្យក្លាយជាការពិតទៅបាន តម្រូវឲ្យមានការខិតខំប្រឹងប្រែងរួមគ្នារវាងរដ្ឋាភិបាល វិនិយោគិន ឧស្សាហកម្មនានា និងសង្គមជាតិទាំងមូល។ ហើយស្នើឲ្យមានទស្សនវិស័យវែងឆ្ងាយសម្រាប់រដ្ឋាភិបាលក្នុងការបង្កើតបរិយាកាសអំណោយផលមួយដល់អ្នកវិនិយោគ បង្កើនការវិនិយោគលើហេដ្ឋារចនាសម្ព័ន្ធបច្ចេកវិទ្យាទំនាក់ទំនងព័ត៌មានវិទ្យា និងដាក់ចេញនូវគោលនយោបាយដូចជាការលើកទឹកចិត្តពន្ធដើម្បីជំរុញសេដ្ឋកិច្ចឌីជីថល ផ្តល់នូវល្បឿនអ៊ិនធឺណិតដ៏លឿន និងផ្តល់នូវធនធាន spectrum ដ៏ប្រសើរ ជាមួយមានគោលការណ៍ប្រដបដោយភាពវិជ្ជមានក្នុងការបំពាក់បច្ចេកវិទ្យា 5G »។
គ្រប់ប្រតិបត្តិករទាំងអស់នៅក្នុងប្រទេសកម្ពុជា បានចាប់ផ្តើមសាកល្បងបច្ចេកវិទ្យា 5G របស់ខ្លួនហើយ ឥឡូវនេះ ពួកគេកំពុងរង់ចាំយ៉ាងអន្ទះសារចំពោះការទទួលបានអាជ្ញាប័ណ្ណពាណិជ្ជកម្ម 5G ហើយបទពិសោធន៍នៃការទទួលយកល្បឿនអ៊ិនធឺណិតចល័តនាពេលបច្ចុប្បន្ននេះនឹងអាចត្រូវបានធ្វើឱ្យប្រសើរឡើងបន្ថែមទៀត ដោយបច្ចេកវិទ្យា 5G ហើយក្នុងចំណោមប្រជាជនចំនួន ៣.៥ លានគ្រួសារនៅក្នុងប្រទេសកម្ពុជា មានតែ ៦% ប៉ុណ្ណោះ ដែលមានអ៊ីនធឺណិតប្រើប្រាស់នៅតាមផ្ទះ។ 5G គឺជាបច្ចេកវិទ្យាដែលមានប្រសិទ្ធភាពបំផុត ដើម្បីធ្វើឱ្យប្រសើរឡើងនូវការតភ្ជាប់អ៊ីនធឺណិតនៅតាមផ្ទះ។ សហគ្រាសចំនួន ៥ ម៉ឺនសហគ្រាស នៅភ្នំពេញក្រុង ព្រះសីហនុសៀមរាបនិងបាត់ដំបង បច្ចេកវិទ្យា 5Gគឺជាជម្រើសដ៏ត្រឹមត្រូវ សម្រាប់អតិថិជននៃសហគ្រាសទាំងនេះ។»
លោក Victor បានបញ្ជាក់ទៀតថា ជាមួយនឹងបច្ចេកវិទ្យាឈានមុខគេដូចជា 5G, Cloud និង AI ក្រុមហ៊ុន Huawei បានប្តេជ្ញាចិត្តក្លាយជាស្ថាប័នដែលអាចបង្កើតនូវឌីជីថលសម្រាប់កម្ពុជាក៏ដូចជាអាស៊ាន ដោយផ្តល់ការប្រឹក្សាយោបល់អំពីយុទ្ធសាស្ត្រឌីជីថលថ្នាក់ជាតិ គាំទ្រដល់ការផ្លាស់ប្តូរបច្ចេកវិទ្យាឌីជីថលនៅក្នុងឧស្សាហកម្មផ្សេងៗ ការបង្កើតប្រព័ន្ធ ecosystem ដ៏ប្រសើរ និងបណ្តុះបណ្តាលកម្លាំងពលកម្មផ្នែកឌីជីថល។នៅក្នុងដំណើរនេះ ក្រុមហ៊ុនHuawei បានបណ្តុះបណ្តាលទេពកោសល្យ ICT រាប់រយនាក់នៅក្នុងប្រទេសកម្ពុជា តាមរយៈការឧបត្ថម្ភនិងកម្មវិធីអភិវឌ្ឍន៍សមត្ថភាពដូចជាកម្មវិធី “គ្រាប់ពូជដើម្បីអនាគត“ និង “Huawei Authorized Information and Network Academy” ជាដើម ហើយសម្រាប់ឆ្នាំ២០២០ ក្រុមហ៊ុន Huawei គ្រោងនឹងបង្កើតគំនិតផ្តួចផ្តើមមួយពីកម្មវិធីគ្រាប់ពូជដើម្បីអនាគតនៃបច្ចេកវិទ្យា 5G ដើម្បីជួយកម្ពុជាក្នុងការបណ្តុះបណ្តាលទេពកោសល្យ 5G ក្នុងស្រុក និងចាប់យកបានកាន់តែប្រសើរសម្រាប់ IR4.0៕