ប្រព័ន្ធ 5G នៅកូរ៉េលឿនហួសនិស្ស័យដោនឡូតរឿងហូលីវូដ ២ ម៉ោងចាំតែមួយភ្លែតបាន!

2019-09-28 11:00:00
ព័ត៌មាន

2019-09-28 11:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីការខិតខំប្រឹងប្រែងយ៉ាងខ្លាំង ពេលនេះប្រទេសកូរ៉េខាងត្បូង បានក្លាយជាប្រទេសដំបូងគេក្នុងលោក មានប្រព័ន្ធ 5G ប្រើប្រាស់ជាសាធារណៈ ដែលចាប់ផ្ដើមកាលពីថ្ងៃទី ៥ ខែមេសា ដោយមានល្បឿនលឿនជាង 4G ចំនួន ៤ ដង។

តេស្តល្បឿន 5G លើ S10

យោងតាមការតេស្តផ្ទាល់ក្នុងស្នាក់ការកណ្ដាល Samsung អ្នកអាចដោនឡូតហ្គេមទំហំ ១,៩ GB ដោយប្រើ 4G ចំណាយពេល ៦ នាទី២៨វិនាទី តែបើប្ដូរមកដាក់ 5G ចំណាយពេលតែ ១ នាទី ៥១ វិនាទីប៉ុណ្ណោះ)។ ជាងនេះទៀត បើអ្នកចង់ដោនឡូតរឿងហូលីវូដ ២ ម៉ោងចំណាយពេលតែ ៥ នាទីទេ។

យ៉ាងណាមិញ ពាក់ព័ន្ធនឹងបទពិសោធន៍របស់អ្នកប្រើនៅទីក្រុងសេអ៊ូល កំពុងតែជាបញ្ហាចោទ ព្រោះនៅមិនទាន់ទូលំទូលាយទូទាំងក្រុងនៅឡើយទេ ពេលអ្នកចេញក្រៅហាង ល្បឿនលោតចូលទៅ 4G វិញ។ ប្រសិនបើអ្នកស្ថិតនៅស្ថានីយ៍រថភ្លើងក្រោមដី សេវា 5G អត់មានតែម្ដងលោតតែ 4G មួយគត់។

រូបតំណាង 5G

ប្រភពពីក្រុមហ៊ុនគមនាគមន៍ដ៏ធំនៅកូរ៉េ SK telecom បានឲ្យដឹងថា មានចំនួនអ្នកចុះឈ្មោះប្រើប្រព័ន្ធ 5G លើទូរសព្ទ Samsung តែបន្តិចប៉ុណ្ណោះ ខណៈអ្នកដទៃរង់ចាំដល់ដំណើរការទូទាំងក្រុងទើបចាប់ផ្តើមចុះឈ្មោះប្រើ ព្រោះថាជាធម្មតាវាដើរលឿនរួចទៅហើយ។

ប្រភពដដែលបញ្ជាក់ថា ល្បឿន ២,៧GB នៅឆ្នាំ ២០១៩ នេះនឹងតម្លើងដល់ ៧GB នៅឆ្នាំ ២០២០។ SK teklecom ចង់ឲ្យអ្នកប្រើប្រាស់ស្មាតហ្វូនចំនួន ១០% ងាកមកប្រើ 5G នៅចុងឆ្នាំ ២០១៩។

Galaxy S10

ត្បិតថា ជួបបញ្ហាអ្នកប្រើប្រាស់មិនទាន់ស៊ាំ ប៉ុន្តែក្រុមហ៊ុនបច្ចេកវិទ្យា Samsung Electronics ដែលជាក្រុមហ៊ុនមានមូលដ្ឋាននៅកូរ៉េខាងត្បូង បានប្រកាសចេញ Galaxy S10 បំពាក់ប្រព័ន្ធ 5G ជាផ្លូវការបានមុនគេ។ Galaxy S10 5G ដែលលក់មុនគេនៅកូរ៉េខាងត្បូងមានតម្លៃប្រមាណ ១ ២៣១ ដុល្លារ សម្រាប់ទំហំ ២៥៦ GB និងម៉ូដែលទំហំ ៥១២ GB មានតម្លៃប្រមាណ ១ ៣៦៦ ដុល្លារ។

សហរដ្ឋអាមេរិកនឹងជាទីផ្សារបន្ទាប់ដែលមានលក់ Galaxy S10 5G ខណៈដែលប្រទេសមហាអំណាចមួយនេះនឹងដំណើរការសេវា 5G របស់ខ្លួន នាថ្ងៃទី ១១ ខែមេសានេះ ដោយមិនទាន់ដឹងតម្លៃលក់នៅឡើយទេ៕

ប្រភព៖ Asia.Nikkei ប្រែសម្រួល៖ រក្សា