- 2019-08-13 06:46:45
- ចំណេះដឹង
ទំនេរៗ! ឆែកអាគុយឡានសិនមុនបើកចេញទៅក្រៅ
- 2019-08-13 06:46:45
- ចំនួនមតិ 0 | ចំនួនចែករំលែក 0
ទំនេរៗ! ឆែកអាគុយឡានសិនមុនបើកចេញទៅក្រៅ
ចន្លោះមិនឃើញ
ជាទូទៅអ្នកដែលប្រើប្រាស់រថយន្ត មិនសូវចាប់អារម្មណ៍ទៅលើអាគុយឡាន ឲ្យតែដេរទៅឆេះមិនសូវខ្វល់ច្រើនឡើយ។ មានសញ្ញាណមួយចំនួន អាចឲ្យអ្នកដឹងមុនថាអាគុយឡានអ្នកជិតខូចឬមិនសាកភ្លើង។
លោក អ៊ុយ សាខន ជាគ្រូបណ្ដុះបណ្ដាលបច្ចេកទេសរថយន្តនៅសាលា JVC បានប្រាប់ Sabay ថា អាគុយឡានមានពីរប្រភេទ គឺអាគុយស្ងួតនិងអាគុយទឹក។
ចំពោះអាគុយស្ងួត ពេលជិតខូចមិនកាន់ភ្លើង គេអាចពិនិត្យមើលលើអាគុយ បើមានពណ៌បៃតងមានន័យថាវានៅមានថាមពលអាចនៅប្រើប្រាស់បាន បើឃើញពណ៌ក្រហមវាជិតអស់ថាមពលជិតដល់ពេលប្តូរថ្មីហើយ តែបើពណ៌សត្រូវតែប្តូរចេញតែម្តង។
លោកបន្តថា ចំពោះអាគុយទឹកវិញ ពេលណាវាអស់គុណភាពឬខូច អាចមើលឃើញដោយធុងអាគុយរាងប៉ោងមានស្នឹមលើក្បាលអាគុយច្រើន ហើយកម្រិតទឹកអាស៊ីដធ្លាក់ចុះឬក៏រីងតែម្ដង និងអាចមានស្នឹមនៅលើក្បាលអាគុយ។
លើសពីនេះនៅពេលយើងដេរបញ្ឆេះ វាមិនងាយឆេះនោះទេ ដែលបញ្ជាក់ថាវាជិតខូចហើយ។ ក្រៅពីនេះវាក៏នឹងលោតសញ្ញាបង្ហាញនៅតាបឡូរថយន្តថា អាគុយមានបញ្ហាមិនកាន់ភ្លើងឬមួយឌីណាម៉ូមិនសាកភ្លើងជាដើម។ ដើម្បីឱ្យកាន់តែច្បាស់ អាចទិញឧបករណ៍ធ្វើតេស្តមកពិនិត្យបន្ថែមក៏បាន។
ចំពោះវិធីងាយៗដើម្បីថែរក្សា លោកប្រាប់ថា ត្រូវជ្រើសរើសប្រភេទអាគុយឱ្យត្រូវនឹងកម្លាំងម៉ាស៊ីនរថយន្តដែលក្រុមហ៊ុនកំណត់។ ពេលដេរបញ្ឆេះម្ដងជា២ដងមិនឆេះ កុំព្យាយាមដេរទៀតព្រោះវាអាចធ្វើឱ្យអាគុយឆាប់ខូច។
លោកបន្ថែមថា ក្នុង១សប្ដាហ៍បើមិនចេញដំណើរទៅណា ក៏ត្រូវបញ្ឆេះរថយន្តពី ៣ ទៅ ៥ នាទី ដើម្បីបំពេញថាមពលឡើងវិញ។ ក្រៅពីនេះ ក៏ត្រូវដុសសម្អាតក្រចាប់អាគុយ (លាងសម្អាត់ជាមួយទឹកក្ដៅ) ឱ្យបានស្អាតកុំឱ្យវាមានស្នឹមឬច្រែះនៅលើក្បាលអាគុយ៕
ចុចអានបន្ត៖
