Sony ចេញកាសឥតខ្សែតម្លៃ ២៣០ ដុល្លារ មកផ្តួល AirPods 2 របស់ Apple

2019-07-08 01:28:21
ផលិតផលថ្មី

2019-07-08 01:28:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Sony ទើបតែប្រកាសចេញផ្សាយនូវកាសឥតខ្សែម៉ូឌែលថ្មី WF-1000XM3 ដែលជាការអាប់ដែតតពីជំនាន់ WF-1000X បង្ហាញខ្លួនកាលពីឆ្នាំ ២០១៧ ខណៈជំនាន់ក្រោយនេះមានការអភិវឌ្ឍនូវស្ថិរភាពប្រព័ន្ធភ្ជាប់ គុណភាពសំឡេង និងមុខងារការពារសំឡេងរំខាន។

ធៀបនឹង AirPods 2 ក៏ដូចជា Galaxy Buds កាសរបស់ក្រុមហ៊ុន Sony មានតួខ្លួនធំជាង ប៉ុន្តែតាមរយៈការតេស្តផ្ទាល់ពីក្រុមការងារ The Verge បានកត់សម្គាល់ឃើញថាម៉ូឌែល WF-1000XM3 អាចប្រើប្រាស់បានក្នុងរយៈពេលយូរដោយមិនឈឺត្រចៀកឬភាពមិនស្រួលអ្វីទាំងអស់។

បំពាក់នូវបច្ចេកវិទ្យាប្រឆាំងសំឡេងរំខាន ដោយរន្ធស្រូបសំឡេងដែលទទួលបានសំឡេងទាំងអស់នៅជុំវិញខ្លួនអ្នក ត្រូវចូលឆ្លងកាត់ដំណើរការជាមួយឈីបថ្មី QN1e ហើយបម្លែងចេញជាមុខងារ Quick Attention ដែលអនុញ្ញាតឲ្យអ្នកប្រើអាចស្តាប់លឺសំឡេងនៅជុំវិញខ្លួនអ្នក ដោយមិនចាំបាច់ដកកាសចេញពីត្រចៀក ត្រឹមរយៈការប្រើប្រាស់ម្រាមដៃបញ្ជាលើប៊ូតុងផ្នែកខាងឆ្វេង ហើយនៅពេលអ្នកដកម្រាមដៃចេញនោះមុខងារប្រឆាំងសំឡេងរំខាននឹងដំណើរការជាធម្មតាវិញ។

នៅផ្នែកខាងស្តាំក៏មានបង្កប់មុខងារឲ្យអ្នកប្រើធ្វើការបញ្ជាបិទបើកចម្រៀង ឬប្តូរបទចម្រៀងថែមទៀតផង។ ធុននេះអាចប្រើប្រាស់បានដល់រយៈពេល ៦ ម៉ោងឬពេញដល់ ៨ ម៉ោងប្រសិនអ្នកបិទចោលមុខងារការពារសំឡេងរំខាន។ ប៉ុន្តែពុំគាំទ្រការសាកឥតខ្សែនោះទេ ដោយប្រអប់សាកមកពីនាយមានគាំទ្រមុខងារសាកថ្មរហ័សស្រាប់។

Sony WF-1000XM3 មានតម្លៃប្រមាណ ២៣០ ដុល្លារ ចំពោះតម្លៃនិងលក្ខណៈសម្បត្តិរបស់វាអាចប្រជែងជាមួយ AirPods 2, Galaxy Buds និង Jabra Elite 65t ដែលកំពុងមានលក់នៅលើទីផ្សារ។