Apple គិតរើការផលិត iPhone ខ្លះៗចេញពីចិន ទៅប្រទេសនៅអាស៊ីអាគ្នេយ៍

2019-06-20 03:19:42
ព័ត៌មាន

2019-06-20 03:19:42
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការចុះផ្សាយរបស់សារព័ត៌មាន Nikkei បានឲ្យដឹងថា Apple កំពុងពិចារណារើការផលិតគ្រឿង Hardware របស់ខ្លួនចន្លោះ ១៥% ទៅ ៣០% ចេញពីប្រទេសចិន។ Apple បានបង្កើតក្រុមមួយដើម្បីពិនិត្យមើលការរើសង្វាក់ផលិតកម្ម និងបានសួរដៃគូផលិតធំៗដូចជា Foxconn, Pegatron និង Wistron ដើម្បីវាយតម្លៃលើជម្រើសដែលមាន។

ការជំរុញដល់ការរើនេះ គឺដោយសារសង្គ្រាមពាណិជ្ជកម្មដែលកើតមានរវាងចិន និងអាមេរិក ដែលរំពឹងថានឹងកាន់តែអាក្រក់ឡើងនៅចុងខែនេះ ពេលដែលការដំឡើងពន្ធ ២៥% លើទំនិញត្រូវចាប់ផ្ដើម។ យ៉ាងណាក្ដី Apple ចង់រើសង្វាក់ផលិតកម្មនេះ ទោះបីជាសង្គ្រាមត្រូវបានបញ្ចប់ក្ដី។

ថ្នាក់ដឹកនាំមកពីដៃគូផ្គត់ផ្គង់មួយរបស់ Apple បានប្រាប់ Nikkei ថា ៖ "អត្រាកំណើតទាប ថ្លៃពលកម្មកើនឡើង និង ភាពប្រថុយប្រថានលើការពឹងផ្អែកសង្វាក់ផលិតកម្មក្នុងប្រទេសតែមួយ។ ទោះបីជាមិនមានសង្គ្រាមពាណិជ្ជកម្ម ក៏ Apple ត្រូវព្រួយចិត្តលើកត្តាទាំងនេះដែរ”។

ត្បិតថាលោក ដូណាល់ ត្រាំ តែងអះអាងថា Apple ពេញចិត្តនឹងគំនិតរើការផលិតពីចិនទៅអាមេរិក ប៉ុន្តែការផលិតទំនងជាត្រូវផ្លាស់ទៅកាន់ប្រទេសនៅអាស៊ីអាគ្នេយ៍ ដោយឥណ្ឌា និងវៀតណាម ចាត់ទុកថាគោលដៅចម្បងសម្រាប់ការផលិត iPhone។ នេះបើតាមប្រភពពី Nikkei ដដែល។

ចំណែក Foxconn វិញ កាលពីពេលថ្មីៗនេះបាននិយាយថា ខ្លួនមានសមត្ថភាពគ្រប់គ្រាន់ដើម្បីរើការផលិត iPhone សម្រាប់លក់នៅអាមេរិក ចេញពីប្រទេសចិនទាំងអស់ ប្រសិនបើចាំបាច់។ រួមជាមួយវៀតណាម និងឥណ្ឌា ប្រទេសម៉ិកស៊ីកូ, ឥណ្ឌូណេស៊ី និងម៉ាឡេស៊ី ក៏ត្រូវបានស្ថិតក្រោមការពិចារណាដែរ៕

ចុចអាន៖

ប្រភព៖ The Verge ប្រែសម្រួល៖ សុខហេង