ការជឿជាក់លើខ្លួនឯង ធ្វើឲ្យយុវជនឌីម៉ង់ ក្លាយជាតារា YouTube លេចធ្លោ

2019-06-12 07:32:26
ព័ត៌មាន

2019-06-12 07:32:26
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជន សុខសាន្ត ឌីម៉ង់ ជាតារា YouTube ដែលកំពុងល្បីលើវីដេអូពញ្ញាក់អារម្មណ៍ (Prank) ដែលមានឈ្មោះថា Dimong Vlogs។

មុនមានគេស្គាល់ច្រើនដូចបច្ចុប្បន្ន ឌីម៉ង បានឆ្លងកាត់រឿងរ៉ាវជូរចត់ជាច្រើន ដូចជាត្រូវចោរព្រួតគ្នាវាយជាដើម។ ចំណែកចំណូលពី YouTube ក៏បានមិនសូវជាច្រើនប៉ុន្មានដែរ ប៉ុន្តែយុវជនមកពីខេត្តសៀមរាបរូបនេះ មិនបោះបង់នោះទេ។

ឌីម៉ង់ បានប្រាប់ខ្លួនឯងថា គ្មានអ្នកណាជួយខ្លួនទេក្រៅពីខ្លួនឯង ជីវិតគឺជាការផ្សងព្រេង។ ប្រយោគ "ជីវិតគឺជាការផ្សងព្រេង" នេះហើយ ដែលអតីតសិស្សវិទ្យាអង្គរខេត្តសៀមរាប Inspire រហូតចាកចេញពីផ្ទះ មកស្នាក់នៅវត្តឧណ្ណាលោម ដើម្បីធ្វើ YouTube។

តាមពិតដើមចមធ្វើឱ្យឌីម៉ង់ ឈានធ្វើវីដេអូ Prank ដោយសារតែខ្លួនមានអារម្មណ៍តានតឹងខ្លាំង ក្រោយបំណងចង់ក្លាយជាគ្រូអង់គ្លេស ដែលគ្រោងតាំងពីវិទ្យាល័យត្រូវរលាយ។

ពេលស្រ្ដេសខ្លាំង ឌីម៉ង់ តែងអង្គុយមើលវីដេអូ Prank បរទេស រួមមានប៉ែកអឺរ៉ុប ឥណ្ឌា កូរ៉េ និង ចិនជាដើម រហូតបែកគំនិតថតវីដេអូ Prank ប្លែកៗដូចសព្វថ្ងៃ។ តាមរយៈការធ្វើវីដេអូពញ្ញាក់អារម្មណ៍ Facebook Page របស់ ឌីម៉ង់ មានអ្នក Like ជាង ៧ ម៉ឺននាក់ ខណៈ YouTube មានអ្នក Subscribe ដល់ទៅជាង 172k (គិតត្រឹមដើមខែមិថុនា ឆ្នាំ២០១៩)។

បើនិយាយពីក្រុមគ្រួសារ ដំបូងឡើយគ្មាននរណាម្នាក់គាំទ្រយុវជនខ្មៅស្រអែមទេ ដ្បិតពួកគាត់ចង់ឱ្យឌីម៉ងសិក្សាឱ្យចប់ចុងចប់ដើម បារម្ភនិងខ្លាចកូនបរាជ័យ។

"ពួកគាត់ស្ដីថាឱ្យខ្ញុំ ព្រោះពួកគាត់ស្រលាញ់ បារម្ភ ចង់ឱ្យកូនល្អ ប៉ុន្តែខ្ញុំដឹងថាខ្ញុំចង់បានអ្វី ខ្ញុំមាន Passion ខាងហ្នឹង អត់មានអ្នកណា រារាំងខ្ញុំបានទេ"។

ឌីម៉ង់ លើកឡើងថា បើចង់ប្រឡូកក្នុងវិស័យ YouTube នេះ គឺត្រូវស្វែងរកអ្វីដែលថ្មីប្លែកពីគេ ហ៊ានធ្វើ ស្មោះត្រង់ ជឿជាក់លើខ្លួនឯង និងកុំគិតពីលុយខ្លាំងពេក។

អតីតនិស្សិតក្រាហ្វិកឌីហ្សាញរូបនេះ ក៏បានប្រាប់ដែរថា ខ្លួនចង់ធ្វើជា YouTuber ល្បីល្បាញមួយរូប និងផលិតវីដេអូប្លែកៗនិយាយជាភាសាខ្មែរ និងអង់គ្លេស ដើម្បីបង្ហាញដល់ពិភពលោកថា ខ្មែរក៏អាចធ្វើវីដេអូល្អមើលដូចបរទេសដែរ។ ចំណែកអនាគត ឌីម៉ង់ចង់បើកជាងហាងកាហ្វេមួយ ព្រោះយុវជនចូលចិត្តអង្គុយ និងទទួលទាននៅហាងកាហ្វេ៕