- 2019-05-22 07:09:35
- ព័ត៌មាន
បច្ចេកវិទ្យាអាមេរិក អាចប៉ះពាល់ខ្លាំងទេ បើចិនធ្វើរឿងនេះតបតវិញ?
- 2019-05-22 07:09:35
- ចំនួនមតិ 0 | ចំនួនចែករំលែក 0
បច្ចេកវិទ្យាអាមេរិក អាចប៉ះពាល់ខ្លាំងទេ បើចិនធ្វើរឿងនេះតបតវិញ?
ចន្លោះមិនឃើញ
បន្ទាប់ពីប្រធានាធិបតីចិន លោក ស៊ី ជិនពីង កាលពីថ្ងៃទី២០ ខែឧសភា ឆ្នាំ២០១៩ បានធ្វើទស្សនកិច្ចនៅក្រុមហ៊ុនរ៉ែកម្រក្នុងផែនដី នៅក្រុង Ganzhou ខេត្ត Jiangxi ភាគខាងកើតប្រទេសចិន ក្នុងអំឡុងពេលមានតានតឹងខ្លាំងនៃសង្គ្រាមពាណិជ្ជកម្មរវាងចិន និងអាមេរិក បានធ្វើឱ្យមានការលើកឡើងជាច្រើនថា មេដឹកនាំចិន នឹងផ្អាកនាំចេញធនធានរ៉ែកម្រ ទៅអាមេរិក ដើម្បីជាការតបតវិញ។
ហេតុអ្វីបានជាមានការលើកឡើងដូច្នេះ ហើយតើរ៉ែកម្រក្នុងផែនដីរបស់ចិន ពិតជាសំខាន់ណាស់មែនទេសម្រាប់អាមេរិក?
រ៉ែកម្រក្នុងផែនដី (Rare-earth materials) រួមមានសារធាតុចំនួន១៧ ក្នុងតារាងខួបនៃធាតុគីមី (Periodic Table) ដែលត្រូវបានប្រើប្រាស់យ៉ាងសំខាន់ក្នុងផលិតកម្មរបស់អាមេរិកដូចជា បច្ចេកវិទ្យា និងឧបករណ៍យោធា ពោលគឺចាប់ពី អាគុយ ទៅដល់ស្មាតហ្វូន រថយន្តអគ្គិសនី និងយន្តហោះចម្បាំងជាដើម។ អាមេរិក ប្រើប្រាស់រ៉ែទាំងនោះក្នុងចំនួនតិច ប៉ុន្តែមានសារៈសំខាន់ក្នុងដំណើរការផលិត។
សារធាតុទាំង១៧មានដូចជា៖ Cerium (Ce), Dysprosium (Dy), Europium (Eu), Gadolinium (Gd), Holmium (Ho), Lanthanum (La0, Lutetium (Lu), Neodymium (Nd), Praseodymium (Pr), Promethium (Pm), Samarium (Sm), Scandium (Sc), Terbium (Tb), Thulium (Tm), Ytterbium (Yb) និង Yttrium (Y)។
ចិនគឺប្រទេសធំបំផុតដែលផលិត និងនាំចេញរ៉ែកម្រ ពោលគឺប្រមាណ៩០% នៃផលិតកម្មសកល។ ក្នុងនោះ អាមេរិកពឹងផ្អែកការនាំចូលរ៉ែកម្រពីចិនប្រមាណ ៨០ភាគរយ នៃការនាំចូលសរុបរបស់ខ្លួន។
ជាការគួរឱ្យកត់សម្គាល់ រដ្ឋបាលដូណាល់ ត្រាំ មិនបានដាក់បញ្ចូលរ៉ែកម្រក្នុងផែនដីរបស់ចិន ចូលក្នុងបញ្ជីដែលត្រូវដំឡើងពន្ធនាំចូលនោះទេ។ អាមេរិក បានដំឡើងពន្ធនាំចូលលើទំនិញរបស់ចិនដែលមានតម្លៃ ២០០ពាន់លានដុល្លារ ពី ១០% ទៅដល់ ២៥%។ ហើយបន្ទាប់មកក៏ចាប់ផ្តើមដាក់បញ្ចូលមុខទំនិញដែលត្រូវដំឡើងពន្ធ ដែលមានតម្លៃ ៣០០ពាន់លានដុល្លារផ្សេងទៀតផងដែរ។
កាលពីដើមខែឧសភានេះ ចិនបានប្រកាសថា ខ្លួនក៏នឹងដំឡើងពន្ធនាំចូលលើទំនិញរបស់អាមេរិកដែលមានតម្លៃ ៦០ពាន់លានដុល្លារ ពី ៥ភាគរយ ទៅដល់ ២៥% ដែលជាការសងសឹកវិញផងដែរ ដោយចាប់ផ្តើមពីថ្ងៃទី១ ខែមិថុនា ឆ្នាំ២០១៩។ ក្នុងនោះសារព័ត៌មានចិន South China Morning Post បានលើកឡើងថា ចិននឹងហាមឃាត់ការនាំចេញរ៉ែកម្រ ទៅអាមេរិក។
រ៉ែកម្ររបស់ចិន ត្រូវបានគេចាត់ទុកថាជាអាវុធដ៏សំខាន់មួយរបស់ចិន។ កាលពីឆ្នាំ២០១០ ក្រុងប៉េកាំង បានកាត់ផ្តាច់ការនាំចេញរ៉ែទៅជប៉ុន ដោយសារតែជម្លោះនៅសមុទ្រចិនខាងកើត ដែលពេលនោះ នាវិករបស់ចិន ត្រូវសមត្ថកិច្ចជប៉ុនចាប់ខ្លួន។ បន្ទាប់ពីចិនដាក់បម្រាមលើការនាំចេញនេះមក បានធ្វើឱ្យជប៉ុន ដោះលែងនាវិកនោះភ្លាមៗតែម្តង។
កាលពីឆ្នាំ២០១១កន្លងទៅ គណៈកម្មាធិការសភាអាមេរិកទទួលបន្ទុកកិច្ចការបរទេស បានបង្ហាញក្តីបារម្ភចំពោះសមត្ថភាពរបស់ចិន ក្នុងការប្រើប្រាស់ «ការនាំចេញរ៉ែកម្រ» ក្នុងគោលនយោបាយការបរទេស និងគោលនយោបាយសន្តិសុខរបស់ខ្លួន៕