កង់ សម្រាប់អ្នកចង់ជិះទៅធ្វើការ តែខ្លាចបែកញើស (មានវីដេអូ)

2019-04-25 02:00:00
ព័ត៌មាន

2019-04-25 02:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខុសប្លែកពីកង់អាគុយធម្មតា ដែលយើងធ្លាប់ឃើញដោយគ្រាន់តែមួលហ្គែរទៅមុខដូចម៉ូតូ ក្រុមហ៊ុនផលិតកង់របស់ប្រទេសស៊ុយអែត បានបញ្ចេញកង់អគ្គិសនីប្រភេទថ្មី ដែលតម្រូវអ្នកដែលចង់ធាក់កង់ទៅធ្វើការតែខ្លាចហត់ពេក បែកញើសធុំក្លិន ដល់មនុស្សនៅជុំវិញខ្លួន។

កង់នេះមានឈ្មោះថា Blix Komfort Prima ដែលមានរាងយ៉ាងសាមញ្ញដូចកង់ជិះទូទៅដែរ ប៉ុន្តែកង់នេះមានតួធ្វើមកពីសំលោហៈដែលស្រាលជាង បូករួមនឹងអាគុយ និងម៉ូទ័រដែលមានទំហំតូចទៀតធ្វើឲ្យកង់នេះមានទម្ងន់ត្រឹមជាង ២០គីឡួក្រាម តែប៉ុណ្ណោះពោលគឺស្រាលជាងច្រើនបើប្រៀបនឹងកង់អាគុយប្រភេទដូចគ្នា ដែលមានទម្ងន់ប្រហែលជិត ៥០ គីឡូក្រាម។

កង់អាគុយនេះដំណើរការដោយម៉ូទ័រ និងអាគុយដែលផលិតដោយក្រុមហ៊ុនជប៉ុន Shimano ដ៏ល្បីដែលមនុស្សសឹងគ្រប់គ្នាស្គាល់ថាជា "លីប" កង់នោះ។

កង់នេះដំណើរការដោយការធាក់ទៅមុខរបស់អ្នកជិះ ហើយភ្លាមនោះ ម៉ូទ័រនឹងជួយរុញកង់នោះឲ្យទៅមុខលឿនតែម្ដង។ បើនិយាយពីការឡើងទួលវិញ គឺអ្នកជិះគ្រាន់តែធាក់ធម្មតាដូចផ្លូវរាបអញ្ចឹង ហើយម៉ូទ័រនឹងជួយសម្រួលទាំងអស់។

ម៉ូទ័រវាមានជម្រើស ៣សម្រាប់ឲ្យអ្នកជិះជ្រើសរើសគឺ High, Normal និង Eco ស្រេចលើការចង់បានល្បឿនយឺតឬក៏លឿន។ ប្រសិនបើប្រើជា Eco mode កង់នេះអាចរត់បានរហូតដល់ទៅជាង ៩៦គីឡូម៉ែត្រ ឯណោះទម្រាំអស់ថ្ម។

កង់នេះពិតជាសាកសមសម្រាប់មនុស្សវ័យជំទង់ដែលស្រឡាញ់បរិស្ថាន ឬក៏មនុស្សវ័យចំណាស់ ដែលចង់ហាត់ប្រាណដោយជិះកង់ដែរ តែមិនចង់ប្រឹងធាក់ខ្លាំងនាំឲ្យមានការចុកចាប់លើរាងកាយ។ កង់នេះមានលក់នៅទីផ្សារបរទេសក្នុងតម្លៃប្រហែល ២៥០០ដុល្លារអាមេរិក ដែលជាតម្លៃដ៏ថ្លៃមួយសម្រាប់កង់អគ្គិសនី។