ក្រុមហ៊ុន Huawei ជាអ្នកអភិវឌ្ឍ និងត្រួសត្រាយផ្លូវបច្ចេកវិទ្យា 5G ដំបូងបំផុតតែមួយគត់នៅកម្ពុជា

2019-03-18 07:48:36
ព័ត៌មាន

2019-03-18 07:48:36
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីសន្និសីទ និងពិព័រណ៍ឌីជីថលកម្ពុជា ២០១៩ ត្រូវបានប្រារព្ធធ្វើឡើងនៅថ្ងៃទី ១៥ ដល់ ១៧ ខែមីនា នៅសាលពិព័រណ៍កោះពេជ្រ រាជធានីភ្នំពេញ ដែលរៀបចំដោយវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) ដោយមានការគាំទ្រពីសំណាក់ក្រសួងប្រៃសណីយ៍ និងទូរគមនាគមន៍ (MPTC)។

ក្នុងឱកាសនៃការបើកកម្មវិធីនេះ ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ៖ "នេះជាលើកទីមួយដែលយើងរៀបចំសន្និសីទ និងពិព័រណ៍ឌីជីថលកម្ពុជា ២០១៩ នៅក្នុងប្រទេស ដើម្បីប្រមូលផ្ដុំគ្រប់ស្ថាប័នពាក់ព័ន្ធទាំងអស់ ទាំងនៅថ្នាក់ជាតិ និងថ្នាក់តំបន់ ស្របនឹងអំឡុងពេលនៃការចាប់ផ្ដើមអាណត្តិថ្មី ដែលជាអាណត្តិទី ៦ របស់រាជរដ្ឋាភិបាលកម្ពុជា។ បច្ចេកវិទ្យាឌីជីថលនឹងផ្ដល់ឱ្យកម្ពុជានូវឱកាសដើម្បីពង្រីកវិសាលភាពនៃការអភិវឌ្ឍចេញពីការអភិវឌ្ឍបែបប្រពៃណី ប៉ុន្តែវាត្រូវការពេលយ៉ាងហោចណាស់ ១០ ឆ្នាំ ដើម្បីបង្កើតសេដ្ឋកិច្ចឌីជីថលមួយដ៏ពេញលេញ"។

លោក David Li នាយកប្រតិបត្តិនៃក្រុមហ៊ុន Huawei Technologies (Cambodia) Co. , Ltd. ក៏បានថ្លែង សុន្ទរកថានៅក្នុងពិធីបើកសន្និសីទ និងពិព័រណ៍ឌីជីថលកម្ពុជា នៅព្រឹកថ្ងៃទី ១៥ ខែមីនា ថា ៖ “ក្រុមហ៊ុន Huawei បានប្ដេជ្ញាចិត្តបន្តប្រតិបត្តិការនៅក្នុងប្រទេសកម្ពុជាអស់រយៈពេល ២០ ឆ្នាំមកហើយ ចាប់តាំងពីឆ្នាំ ១៩៩៩ ម្ល៉េះ។ ឆ្នាំនេះគឺជាខួប ២០ ឆ្នាំរបស់ក្រុមហ៊ុន Huawei នៅកម្ពុជា។ វឌ្ឍនភាពជាមួយចក្ខុវិស័យ និងបេសកកម្មដ៏ច្បាស់លាស់របស់ក្រុមហ៊ុន Huawei ដោយការនាំយកឌីជីថលទៅកាន់មនុស្សគ្រប់រូប គ្រប់គេហដ្ឋាន និងគ្រប់ស្ថាប័ន ដើម្បីបណ្ដាញតភ្ជាប់ដ៏ឆ្លាតវៃ និងកម្ពុជាដ៏ឆ្លាតវៃ ដែលស្របទៅនឹងប្រធានបទនៃសន្និសីទ និងពិព័រណ៍ឌីជីថលកម្ពុជា” ។

លោក David បានបន្តថា ក្នុងនាមជាអ្នកឧបត្ថម្ភធំដល់ "ឌីជីថលកម្ពុជា" ក្រុមហ៊ុន Huawei ជឿជាក់ថា "ឌីជីថលកម្ពុជា" ដែលបានផ្ដួចផ្ដើមដោយរាជរដ្ឋាភិបាលកម្ពុជា នឹងក្លាយជាវេទិកាដ៏អស្ចារ្យមួយ ដែលផ្ដល់ឱកាសដល់ស្ថាប័នពាក់ព័ន្ធទាំងអស់ក្នុងវិស័យ ICT ដើម្បីផ្លាស់ប្តូរគំនិត និងក៏ជាព្រឹត្តិការណ៍ដ៏សំខាន់មួយដែលនឹងជួយប្រទេសកម្ពុជាឆ្ពោះទៅរកឧស្សាហកម្មជំនាន់ទី ៤។ ក្នុងនាមជាអ្នកត្រួសត្រាយផ្លូវនៃបច្ចេកវិទ្យា 5G ក្រុមហ៊ុន Huawei បានចាប់ផ្ដើមការស្រាវជ្រាវ និងអភិវឌ្ឍបច្ចេកវិទ្យា 5G នៅដើមឆ្នាំ ២០០៩ ហើយបច្ចុប្បន្ននេះ Huawei គឺជាអ្នកផ្គត់ផ្គង់តែមួយគត់ដែលអាចផ្ដល់នូវប្រព័ន្ធបច្ចេកវិទ្យា 5G នេះ។

"ប្រទេសកម្ពុជា គឺជាទីផ្សារកំពុងរីកចម្រើន ដែលជាថាមពលដ៏អស្ចារ្យមួយ ក្នុងការផ្សារភ្ជាប់រវាងការច្នៃប្រឌិត និងអាជីវកម្ម។ ឆ្នាំ ២០១៩ នឹងក្លាយជាឆ្នាំដ៏សំខាន់មួយសម្រាប់បច្ចេកវិទ្យា 5G នៅកម្ពុជា។ ក្រុមហ៊ុន Huawei ដែលជាអ្នកផ្គត់ផ្គង់ឈានមុខគេលើពិភពលោកនៃបច្ចេកវិទ្យា 5G នឹងជួយដល់ប្រតិបត្តិករទាំងអស់ឱ្យសម្រេចក្តីសុបិននៃបច្ចេកវិទ្យា 5G របស់ពួកគេ។ យើងនឹងបន្តវិនិយោគបច្ចេកវិទ្យា 5G អ៊ីនធឺណិត Cloud AI និងឧបករណ៍ឆ្លាតវៃ ដើម្បីជួយអតិថិជនរបស់យើងបង្កើនអត្ថប្រយោជន៍ជាមួយបច្ចេកវិទ្យាដ៏លេចធ្លោនេះ"។ លោក David បានបន្ថែម។

នៅក្នុងសន្និសីទ និងពិព័រណ៍ឌីជីថលកម្ពុជា ក្រុមហ៊ុន Huawei បានរៀបស្តង់បង្ហាញពីបច្ចេកវិទ្យាចុងក្រោយបង្អស់ 5G ដំណោះស្រាយបច្ចេកវិទ្យា Cloud និងទូរសព្ទ 5G ដំបូងគេបង្អស់នៅក្នុងប្រទេសកម្ពុជាគឺ Huawei Mate X៕

អត្ថបទ៖ សុខហេង