មូលនិធិអាជីវកម្មឌីជីថលរបស់ Smart បន្ថែមការវិនិយោគលើក្រុមហ៊ុនធំ ២ ទៀត

2019-03-13 03:44:58
ព័ត៌មាន

2019-03-13 03:44:58
ចំនួនមតិ 0 | ចំនួនចែករំលែក 0

ចន្លោះមិនឃើញ

មូលនិធិសម្រាប់អាជីវកម្មបែបឌីជីថលរបស់ក្រុមហ៊ុន Smart Axiata (SADIF) បានប្រកាសពីការវិនិយោគចុងក្រោយបំផុតរបស់ខ្លួន ក្នុងក្រុមហ៊ុន Okra Solar ដែលជាក្រុមហ៊ុនផ្គត់ផ្គង់កម្មវិធីថាមពល solar ក្នុងកម្ពុជា និងក្រុមហ៊ុន Sousdey Cambodia ដែលជាកម្មវិធីទីផ្សារបែបឌីជីថល និងដំណោះស្រាយសហគ្រាសសម្រាប់ការគ្រប់គ្រងទំនាក់ទំនងជាមួយអតិថិជន។ តាមរយៈការចូលរួមជាមួយនឹងក្រុមក្រុមហ៊ុន Morakot Technology, Joonaak Delivery, Nham24 និង Agribuddy ក្រុមវិនិយោគិននៃអាជីវកម្មឌីជីថលក្នុងស្រុករបស់មូលនិធិ SADIF បានពង្រីកវិសាលភាពរបស់ខ្លួនរហូតដល់ ៦ ក្រុមហ៊ុនហើយ។

ក្នុងពេលនេះ មូលនិធិ SADIF គឺជាសហវិនិយោគិន ជាមួយមូលនិធិ Schneider Energy Access Fund (Schneider Electric)។ មុនពេលទទួលបានហិរញ្ញវត្ថុពីមូលនិធិ SADIF ក្រុមហ៊ុន Okra ទទួលបានការគាំទ្រពីអង្គការសំខាន់ៗ ដូចជាអង្គការ UKAid និង អង្គការ SNV Netherlands Development Organization។

លោក គឹម បូរ៉ា ដៃគូរបស់ក្រុមហ៊ុន Mekong Strategic Partners ជាក្រុមហ៊ុនវិនិយោគដែលគ្រប់គ្រងមូលនិធិ SADIF បានឲ្យដឹងថា៖ «ការវិនិយោគរបស់យើងទៅក្នុងក្រុមហ៊ុន Okra បញ្ជាក់ពី សារសំខាន់នៃរបកគំហើញថ្មី ដើម្បីដោះស្រាយ បញ្ហាទាក់ទងទៅនឹងប្រជាពលរដ្ឋដែលខ្វះខាតការផ្គត់ផ្គង់បំផុត ខណៈពេលដែលពួកគេបន្តការចូលរួមផ្ដល់នូវកំណើនសេដ្ឋកិច្ចនិងបង្កើតឥទ្ធិពលក្នុងមាត្រដ្ឋានសកល។ ក្រុមហ៊ុន Sousdey Cambodia ផ្ដោតលើល្បឿន ក៏ដូចជាទំហំនៃកម្មវិធីដែលមានមូលដ្ឋានលើ AI ដើម្បីដោះស្រាយបញ្ហាទាក់ទងនឹងការចូលរួមរបស់អតិថិជន»។

លោក ថូម៉ាស់ ហ៊ុន (Thomas Hundt) នាយកប្រតិបត្តិក្រុមហ៊ុន Smart Axiata បានបញ្ជាក់ថា៖ «អគ្គិសនីគឺជាកត្តាចាំបាច់មួយសម្រាប់ជីវភាពជីវភាពរស់នៅរបស់មនុស្សទូទៅ ប៉ុន្តែ មនុស្សជាង១,២ពាន់លាននាក់នៅក្នុងពិភពលោកបន្តរស់នៅដោយគ្មានអគ្គិសនីគ្រប់គ្រាន់។ បច្ចេកវិទ្យាខុសប្លែកពីគេ និងគំរូអាជីវកម្មរបស់ក្រុមហ៊ុន Okra មានសមត្ថភាពផ្គត់ផ្គង់ និងឆ្លើយតបជាវិជ្ជមានដល់ពលរដ្ឋដែលរស់នៅគ្មានអគ្គីសនីក្នុងប្រទេសកម្ពុជា និងផ្គត់ផ្គង់លើពីនេះទៅទៀត»។

លោក ថូម៉ាស់ ហ៊ុន នាយកប្រតិបត្តិក្រុមហ៊ុន Smart Axiata

Okra គឺជាក្រុមហ៊ុនបច្ចេកវិទ្យាបែប “Internet of Things (IoT)” ដោយជួយសហគមន៏ជនបទដាច់ស្រយាលក្នុងការទទួលបានបច្ចេកវិទ្យាពន្លឺព្រះអាទិត្យដែលមានតម្លៃសមរម្យដោយប្រើថាមពលចែកចាយទំនើប។ ក្រុមហ៊ុននេះ បានផ្គត់ផ្គង់អគ្គិសនីដល់ប្រជាពលរដ្ឋជា ៥០០ នាក់ និងគ្រួសារជាង ១០០ គ្រួសារក្នុងប្រទេសកម្ពុជាក្រោយការសាកល្បង និងចុះអនុស្សរណៈយោគយល់គ្នាជាមួយនឹងក្រុមហ៊ុនចែកចាយអគ្គិសនីជាតិ និងអន្តរជាតិជាច្រើន។ នាពេលថ្មីនេះៗ ក្រុមហ៊ុនបានចុះកិច្ចសន្យាក្លាយជាក្រុមហ៊ុនផ្គត់ផ្គង់បច្ចេកវិទ្យា លើមូលនិធិវិនិយោគហេដ្ឋារចនាសម្ពន្ធ ដែលមានគោលបំណងផ្គត់ផ្គង់អគ្គិសនីសម្រាប់ប្រជាពលរដ្ឋ ៤ ម៉ឺននាក់ក្នុងប្រទេសហ្វីលីពីន ស្របពេលគ្រួសារប្រហែល ២ លាន៤ សែននាក់រស់នៅដោយគ្មានថាមពលអគ្គិសនីនៅឡើយ។

ក្នុងនោះ លោក Djibril Cisse ស្ថាបនិក និងនាយកប្រតិបត្តិក្រុមហ៊ុន Sousdey Cambodia ដែលជាក្រុមហ៊ុនដំបូងគេក្នុងទីផ្សារក្នុងស្រុក ដែលប្រើប្រាស់សេវាឆ្លងឆ្លើយស្វ័យប្រវត្តិលើកម្មវិធី Facebook Messenger និងជាក្រុមហ៊ុនដំបូងគេបង្អស់ដែលបង្កើតកម្មវិធី Khmer Natural Language Processing ដែលផ្តោតលើកម្មវិធី AI បានលើកឡើងថា ៖ «ការផ្ដល់ប្រាក់ពីមូលនិធិ SADIF នឹងជួយដល់ការអភិវឌ្ឍកម្មវិធីរបស់យើងឲ្យកាន់តែប្រសើរឡើង ខណៈពេលពង្រឹងការខិតខំ ប្រឹងប្រែងផ្នែកលក់ និងទីផ្សារដើម្បីពង្រីកផលិតផលរបស់យើង។ ក្រុមហ៊ុន Sousdey Cambodia សង្ឃឹមថា នឹងសហការជាមួយក្រុមហ៊ុន Smart ក្រុមហ៊ុន Forte និង ក្រុមហ៊ុនMSP ដើម្បីជួយដល់អតិថិជនសហគ្រាស និងបង្កើតផលិតផល លំដាប់ថ្នាក់ពិភពលោករបស់សហគ្រាស»។

លោក Charles Cheo នាយកប្រតិបត្តិក្រុមហ៊ុនធានារ៉ាប់រង Forte និងជាក្រុមហ៊ុនដៃគូរបស់មូលនិធិ SADIF បានបន្ថែមថា៖ «កំណើនទីផ្សារយ៉ាងឆាប់រហ័សនៃពាណិជ្ជកម្មអេឡិចត្រូនិក ផ្ដល់ឱកាសដល់ពាណិជ្ជករដើម្បីបង្កើតទំនាក់ទំនងជាមួយអតិថិជនដ៏ច្រើន។ ទោះជាយ៉ាងណាក៏ដោយចំណុចអកុសលជាទូទៅ គឺថា ចាប់តាំងពីប្រតិបត្តិការទាំងអស់ត្រូវបានដំណើរការដោយដៃ បញ្ហាអាចកើតមានឡើងនៅក្នុងដំណើរការទាំងមូល។ ដំណោះស្រាយសហគ្រិនរបស់ក្រុមហ៊ុន Sousdey មានសមត្ថភាពក្នុងកត់សម្គាល់ទាំងអតិថិជន និងពាណិជ្ជករ»៕

អត្ថបទ៖ សុខណា