- 2019-02-25 08:51:58
- ផលិតផលថ្មី
Lenovo ចេញអេក្រង់ ១៤ អ៊ីញថ្មី ប្រើ USB-C ហើយអាចយកតាមខ្លួនបាន
- 2019-02-25 08:51:58
- ចំនួនមតិ 0 | ចំនួនចែករំលែក 0
Lenovo ចេញអេក្រង់ ១៤ អ៊ីញថ្មី ប្រើ USB-C ហើយអាចយកតាមខ្លួនបាន
ចន្លោះមិនឃើញ
ក្រុមហ៊ុនផលិតកុំព្យូទ័រដ៏ល្បីឈ្មោះ Lenovo បានបញ្ចេញផលិតផលថ្មីមួយរបស់ខ្លួន គឺអេក្រង់បង្ហាញរូបភាពទំហំ ១៤ អ៊ីញមួយ ដែលមានប្រើរន្ធ USB-C ហើយអ្វីដែលកាន់តែពិសេសនោះ គឺអេក្រង់នេះ ជាអេក្រង់ចល័ត អាចយកតាមខ្លួនបាន។
អេក្រង់ថ្មីនេះមានឈ្មោះថា Lenovo ThinkVision M14 មានទំហំ ១៤ អ៊ីញ ជាប្រភេទ IPS ដែលមាន Resolution កម្រិត Full HD 1920x1080 មានទម្ងន់ ៥៨០ ក្រាម ហើយអាចភ្ជាប់ជាអេក្រង់បន្ថែមរបស់ Laptop តាមរន្ធតប្រភេទ USB-C បាន។ យ៉ាងណាមិញ ThinkVision M14 នេះ មិនមានថ្មបំពាក់មកជាមួយនោះឡើយ ដែលវានឹងទាញថាមពលពីឧបករណ៍ដែលវាភ្ជាប់ជាមួយនោះ ដូចជា Laptop Tablet និង ទូរសព្ទដៃជាដើម។ ខាងក្រុមហ៊ុន Lenovo ផ្ទាល់មិនបានប្រាប់ពីអត្រាស៊ីភ្លើងរបស់ ThinkVision M14 នេះឲ្យបានជាក់លាក់នៅឡើយទេ ប៉ុន្តែគេអាចសន្និដ្ឋានបានថាវាមិនសូវស៊ីភ្លើងប៉ុន្មានឡើយ ដោយសារតែប្រភេទអេក្រង់របស់វា។
និយាយពីរូបរាងវិញ ThinkVision M14 មានកម្រាស់ស្ដើងខ្លាំងបើប្រៀបទៅនឹងអេក្រង់ចល័តជាគូប្រជែងដទៃទៀត ហើយទម្ងន់ក៏ស្រាលដែរ។ អ្វីដែលកាន់តែពិសេសនោះ គឺអេក្រង់ចល័តរបស់ Lenovo នេះ មានរន្ធ USB-C ដល់ទៅ ២ ដែលនៅម្ខាងឆ្វេងម្ខាងស្ដាំ ជួយសម្រួលសម្រាប់ការភ្ជាប់ទៅនឹងកុំព្យូទ័រពីគ្រប់ខាង។ ម៉្យាងវិញទៀត វាក៏មានជម្រើសជើងទម្រ ដែលអាចកំណត់កម្ពស់អេក្រង់ចល័តនេះបានទៀតផង ជួយសម្រួលកុំឲ្យអ្នកប្រើប្រាស់ឈ្ងោកខ្លាំងពេក។
ប៉ុន្តែ ក៏នៅមានចំណុចអវិជ្ជមានមួយដែរ សម្រាប់ ThinkVision M14 នេះគឺ វាមានគែមសល់ធំពេក ដែលជាមើលទៅមិនសូវទំនើប និងខាតកន្លែងទំនេរច្រើនដែលគេអាចពង្រីកទំហំផ្ទៃអេក្រង់ដោយប្រើតួទំហំប៉ុនគ្នានេះបាន។ Lenovo ThinkVision M14 នឹងមានដាក់លក់ក្នុងអំឡុងរដូវក្ដៅខាងមុខនេះហើយ ដោយមានតម្លៃ ២៤៩ ដុល្លារ (ទីផ្សារបរទេស)។
ចុចអាន៖