- 2018-11-03 00:54:00
- ហាងឆេងផលិតផល
ហាងឆេងគ្រឿងបន្លាស់រថយន្ត ចង់ដឹងអាចចូលមើលបាន
- 2018-11-03 00:54:00
- ចំនួនមតិ 0 | ចំនួនចែករំលែក 0
ហាងឆេងគ្រឿងបន្លាស់រថយន្ត ចង់ដឹងអាចចូលមើលបាន
ចន្លោះមិនឃើញ
នៅពេលដែលរថយន្តត្រូវចូលយានដ្ឋានជួសជុល ក្រៅពីការអង្គុយរង់ចាំហើយនោះ ជាងរថយន្តក៏មកប្រាប់អ្នកថារថយន្តរបស់អ្នកខូចផ្នែកនេះ ដែលពេលខ្លះអ្នកមិនទាំងដឹងអំពីផ្នែកនោះថាវាមានរូបរាងដូចម្ដេច ប្រើសម្រាប់ធ្វើអ្វី ហើយនៅទីណាផងនោះ។ ម៉្យាងទៀត អ្នកក៏មិនអាចដឹងពីតម្លៃប្រហាក់ប្រហែលរបស់វានៅ ក្នុងទីផ្សារផងដែរ។ ថ្លៃថោកអី យ៉ាងហោចណាស់ អ្នកក៏គួរដឹងពីតម្លៃវាលក់ក្នុងទីផ្សារបរទេសដែរ។
ថ្ងៃនេះ Sabay នាំជូននូវគ្រឿងរថយន្តចំនួន ១០ ក្នុងចំណោម ៥០ មានទាំងតម្លៃ និងរូបរាង ដែលអាចឲ្យអ្នកទាំងអស់គ្នាស្គាល់ថាអ្វីជាអ្វីបាន៖
បញ្ជាក់ថា៖ តម្លៃនេះនៅបរទេសទេ
១. ប្រដាប់បញ្ជា ABS (ABS Control Unit)
តម្លៃចាប់ពី៖ ៣២ ដុល្លារ (តម្លៃលើទីផ្សារបរទេស)
ប្រដាប់បញ្ជា ABS ជាខួរក្បាលនៃប្រព័ន្ធហ្វ្រាំង ដោយវានឹងគណនាសម្ពាធហ្វ្រាំង និងល្បឿងកង់ ដើម្បីបន្ថែមឬបន្ថយសម្ពាធទៅលើកង់រថយន្ត។ ប្រសិនបើប្រដាប់បញ្ជា ABS ខូច វានឹងបណ្ដាលឲ្យមានលោតភ្លើង ABS លើកុងទ័ររថយន្តហើយ។ ស្វែងយល់ពីភ្លើង ABS ដែលលោតលើកុងទ័ររថយន្ត
២. កុំប្រែសស័រម៉ាស៊ីនត្រជាក់ (AC Compressor)
តម្លៃចាប់ពី៖ ៩០ ដុល្លារ (តម្លៃលើទីផ្សារបរទេស)
កុំប្រែសស័រម៉ាស៊ីនត្រជាក់មាននាទីបណ្ណែនសារធាតុត្រជាក់។ វាប្រៀបបានដូចជាបេះដូងនៃម៉ាស៊ីនត្រជាក់អ៊ីចឹង។ បើសិនជាម៉ាស៊ីនត្រជាក់រថយន្តមានបញ្ហា ផ្នែកដែលគួរឆែកមុនគេគឺកុំប្រែសស័រនេះហើយ។
៣. ម៉ូទ័រភ្លើង (Alternator)
តម្លៃចាប់ពី៖ ៦០ ដុល្លារ (តម្លៃលើទីផ្សារបរទេស)
ម៉ូទ័រភ្លើងអាចដំណើរការបានដោយការថ្ពក់ក្បាលរបស់វាទៅ នឹងម៉ាស៊ីនរថយន្តឲ្យវិលដោយប្រើខ្សែពាន។ នៅពេលដែលក្បាលម៉ូទ័រចាប់ផ្ដើមវិល វានឹងបង្កើតភ្លើងដើម្បីផ្គត់ផ្គង់ការប្រើប្រាស់គ្រឿងនានា ក្នុងរថយន្តដូចជាចង្កៀង និងអំពូលជាដើម ហើយវាក៏ជួយសាកភ្លើងឲ្យអាគុយវិញផងដែរ។
៤. ភ្លៅ (Axle Shafts)
តម្លៃចាប់ពី៖ ៤២ ដុល្លារ (តម្លៃលើទីផ្សារបរទេស)
ភ្លៅរថយន្តគឺជារបារវែងដែលភ្ជាប់ទៅនឹងកង់រថយន្ត ហើយខ្ទាស់ជាប់នឹងកង់រថយន្ត។ ដូចនេះ នៅពេលដែលប៉ុងរថយន្តចាប់ផ្ដើមវិល ក្បាលផ្លូវដែលមានស្ពឺទាក់ទៅនឹងប៉ុងរថយន្តនោះ ក៏វិលទៅតាមនោះដែរ ជាហេតុធ្វើឲ្យកង់រថយន្តវិលបានដូចគ្នា។
៥. អាប៊ូហ្សេ ឬរ៉ូទីល (Ball Joints)
តម្លៃចាប់ពី៖ ១៦ ដុល្លារ (តម្លៃលើទីផ្សារបរទេស)
អាប៊ូហ្សេ មានទីតាំងស្ថិតនៅជាមួយផ្នែកខាងចុងនៃបូមរថយន្ត និងតំណភ្ជាប់ទៅកាន់ប្រព័ន្ធចង្កូត។ បើសិនជា អាប៊ូហ្សេនេះខូច វានឹងធ្វើឲ្យរថយន្តឮសំឡេង ក្លឹកក្លាក់ ដូចរលុងអ្វីមួយអ៊ីចឹង ហើយវានឹងមានសំឡេងរំខានកាន់តែខ្លាំងឡើង ពេលយូរទៅ។
៦. ម៉ូទ័រកង្ហារ (Blower Motor)
តម្លៃចាប់ពី៖ ២៧ ដុល្លារ (តម្លៃលើទីផ្សារបរទេស មិនទាន់គិតកម្លាំងពលកម្មចូល)
ម៉ូទ័រកង្ហារជាម៉ូទ័រដែលបក់នាំខ្យល់ចូលមកក្នុងរថយន្ត ដោយវាមានទីតាំងនៅខាងក្រោយប្រអប់ដាក់ឥវ៉ាន់អ្នកអង្គុយនៅខាងមុខ។ នៅពេលខ្លះ ម៉ូទ័រនេះអាចនឹងផ្ដល់សំឡេងរំខាន ឬក៏លែងដំណើរការតែម្ដង ដែលសុទ្ធសឹងជារឿងត្រូវប្ដូរថ្មី។
៧. កញ្ចាប់ហ្វ្រាំង (Brake Caliper)
តម្លៃចាប់ពី៖ ២៥ ដុល្លារ (តម្លៃលើទីផ្សារបរទេស)
កញ្ចាប់ហ្វ្រាំងគឺជាសំណុំមួយដែលផ្ទុកស្បែកហ្វ្រាំង ហើយនៅពេលដែលយើងជាន់ហ្វ្រាំង កញ្ចាប់នេះនឹងផ្អឹបចូលដើម្បីឲ្យស្បែកហ្វ្រាំងកកិតនឹងថាសហ្វ្រាំងដែលនៅជាប់កង់ ធ្វើឲ្យរថយន្តអាចឈប់បាន។
៨. ដុំភ្លើងចង្កៀងខាងក្រោយពេលជាន់ហ្វ្រាំង (Brake Light Switch)
តម្លៃចាប់ពី៖ ៧ ដុល្លារ (តម្លៃលើទីផ្សារបរទេស)
នៅពេលដែលយើងជាន់ហ្វ្រាំង ដុំនេះហើយជាអ្នកជួយឲ្យចង្កៀងខាងក្រោយលោតភ្លើងពណ៌ក្រហម។ បើសិនជាពេលជាន់ហ្វ្រាំងហើយ ចង្កៀងខាងក្រោយមិនភ្លឺទេនោះ អ៊ីចឹងបានន័យថាអ្នកគួរមើលដុំភ្លើងនេះហើយ ថាតើវាជាមូលហេតុឬក៏យ៉ាងណា។
៩. ថាសហ្វ្រាំង (Brake Rotor)
តម្លៃចាប់ពី៖ ២០ ដុល្លារ (តម្លៃលើទីផ្សារបរទេស មិនទាន់គិតកម្លាំងពលកម្មចូល)
ថាសហ្វ្រាំង ជាដុំថាសមួយដែលមួលជាប់នឹងកង់ ហើយវាធ្វើការជាមួយនឹងកញ្ចាប់ហ្វ្រាំងបំពាក់ជាមួយស្បែកហ្វ្រាំង ដើម្បីបញ្ឈប់ឬបន្ថយល្បឿនរថយន្ត។ ជាធម្មតា ថាសហ្វ្រាំងអាចនឹងខូចខាតពេលប្រើយូរ ដោយសារតែកម្ដៅកើតឡើង ពេលកកិត និងភាពសឹករេចរឹលរបស់វា។
១០. ឡាបបាកាម (Camshaft)
តម្លៃចាប់ពី៖ ១០៩ ដុល្លារ (តម្លៃលើទីផ្សារបរទេស)
ឡាបបាកាម មាននាទីសម្រាប់បិទបើកវ៉ាល់នៅក្នុងម៉ាស៊ីន សម្រាប់ឲ្យខ្យល់និងប្រេងចូល ហើយឲ្យផ្សែងក្រោយចំហេះចេញពីក្នុងម៉ាស៊ីន។ បញ្ហាដែលអាចបណ្ដាលឲ្យ ឡាបបាកាមខូច គឺអាចមកពីសម្ពាធប្រេងមិនគ្រប់គ្រាន់ ឬក៏អាចនិយាយបានថា ខ្វះប្រេងរំអិល ដែលធ្វើឲ្យវាឆាប់ខូច។
ចំពោះ គ្រឿងផ្សេងៗរបស់រថយន្ត និងតម្លៃរបស់វា Sabay នឹងនាំមកជូនក្នុងពេលក្រោយៗទៀត។
ចុចអាន៖
