- 2018-09-06 03:44:49
- ព័ត៌មាន
វៀតណាមជាទីផ្សារ Ecommerce សំខាន់បំផុតមួយនៅអាស៊ីអាគ្នេយ៍
- 2018-09-06 03:44:49
- ចំនួនមតិ 0 | ចំនួនចែករំលែក 0
វៀតណាមជាទីផ្សារ Ecommerce សំខាន់បំផុតមួយនៅអាស៊ីអាគ្នេយ៍
ចន្លោះមិនឃើញ
ក្នុងក្រសែភ្នែកបណ្ដាវិនិយោគិន វៀតណាមជាប្រទេសមួយមានសក្ដានុពលបំផុត ក្នុងតំបន់អាស៊ីអាគ្នេយ៍ ចំពោះពាណិជ្ជអេឡិចត្រូនិក ឬឌីជីថល (eCommerce)។ ជាមួយនឹងកំណើនប្រចាំឆ្នាំដ៏គួរឱ្យភ្ញាក់ផ្អើល (៣៣%) កាលពី២ឆ្នាំមុន eCommerce ប្រទេសវៀតណាមក៏ជាប់ចំណាត់ថ្នាក់ខ្ពស់ក្នុងតំបន់ផងដែរ។ ក្រុមហ៊ុនពិគ្រោះយោបល់អាជីវកម្ម Frost & Sullivan បានព្យាករណ៍ថា ទីផ្សារ eCommerce ប្រទេសជាប់ព្រំដែនកម្ពុជានេះ នឹងកើនដល់ ៣,៧ពាន់លានដុល្លារ នៅត្រឹមឆ្នាំ ២០៣០។ ឆ្នាំ២០១៧ ជាពេលវេលាដ៏អំណោយផលបំផុត ដោយបានទាញការវិនិយោគិនបរទេសយ៉ាងច្រើន មករកស៊ីវិស័យនេះ។
ដើម្បីស្វែងយល់ពីការវិនិយោគ គេហទំព័រជំនាញផ្នែកស្រាវជ្រាវជំនួញបែបឌីជីថលiPrice និង Cento Ventures បានសហការគ្នា សិក្សាពីការវិយោគលើវិស័យ eCommerce នៅវៀតណាម។ ជាលទ្ធផលអ្នកជំនាញទាំងពីរ បានរកឃើញរឿងគួរឱ្យចាប់អារម្មណ៍មួយចំនួន។
អ្នកណានៅពីក្រោយការផ្ដល់ហិរញ្ញប្បទានក្នុងវិស័យ eCommerce នៅវៀតណាម?
ក្រុមហ៊ុនដែលវិយោគខ្លាំងបំផុតទៅក្នុងទីផ្សារ eCommerce វៀតណាមមាន Alibaba, Tencent, Temasek Holdings, Dragon Capital and CyberAgent Ventures និង IDG Ventures Vietnam។ ប៉ុន្តែ Alibaba, Tencent, និង Temasek Vietnam ទើបតែបានចាប់ផ្ដើមប៉ុន្មានឆ្នាំថ្មីៗប៉ុណ្ណោះ។ ខែ មករា ឆ្នាំ ២០១៨ JD.Com ក្រុមហ៊ុនអ៊ីនធឺណិតធំបំផុតរបស់ Tencent (ចិន) បានវិនិយោគលើក្រុមហ៊ុនវៀតណាម Tiki.vn ហើយក្លាយជាម្ចាស់ភាគហ៊ុនធំបំផុតនៃក្រុមហ៊ុនមួយនេះ។ បើតាមការប៉ាន់ប្រមាណរបស់ព័ត៌មានក្នុងស្រុក ទំហំនៃការវិនិយោគមានប្រហែល ៤៤ លានដុល្លារអាមេរិក។ មិនតែប៉ុណ្ណោះ ក្រុមហ៊ុនTencent ថ្មីៗនេះ ក៏បានពង្រីកភាគហ៊ុនរបស់ខ្លួន ក្នុងក្រុមហ៊ុនឌីជីថល និង VNG ដែលមានតែមួយគត់នៅវៀតណាម។
បន្ថែមលើនេះ ក្រុមហ៊ុនមានមូលដ្ឋាននៅសិង្ហបុរី SEA Limited (Garena) បានហក់ចូលទីផ្សារវៀតណាមតាមរយក្រុមហ៊ុនទូរស័ព្ទដៃ Shopee ដែល Tencent ជាម្ចាស់ភាគហ៊ុនធំបំផុត។
ចំណែកក្រុមហ៊ុន Lazada ដែលជារបស់លោក Jack Ma ដែរនោះ គឺគាំទ្រដោយ Alibaba រួមជាមួយនឹងក្រុមហ៊ុន Temasek Holdings និង Global Investment ជារបស់រដ្ឋាភិបាលសិង្ហបុរី។ ឆ្នាំ ២០១៤ Temasek Holdings បានវិនិយោគលើ ២៤៩ លានដុល្លារ លើ Lazada។ ឆ្នាំ ២០១៧ Alibaba វិនិយោគ ១ពាន់លានដុល្លារ កើនភាគហ៊ុនសរុប ៨៣%។ មុនវិនិយោគលើ Lazada ក្រុមហ៊ុនTemasek ក៏បានបោះទុនលើក្រុមហ៊ុនអ៊ីនធឺណិត FPT Corporation របស់ Sendo និង FPT Shop របស់វៀតណាមដែរ។ ឆ្នាំ ២០១៨ Sendo បានក្លាយជាក្រុមហ៊ុន eCommerce ពេញនិយមបំផុតនៅវៀតណាម។
ការស្រាវជ្រាវក៏បានបង្ហាញថា វៀតណាមក៏ជាទីផ្សារមានសក្ដានុពលមួយផងដែរ សម្រាប់វិនិយោគិនបរទេស ពិភពលោកមានដូចជា ជប៉ុន អាល្លឺម៉ង់ និងអាមេរិកជាដើម។
ក្រុមហ៊ុនជប៉ុនទាំង៦ ដែលមកវិនិយោគនៅវៀតណាមមាន BEENOS, CyberAgent Ventures, econtext Asia , SBI Holdings, Sumitomo Corporation, Trancosmos។ ជប៉ុនបានវិនិយោគ ៩,១ពាន់លានដុល្លារ ខណៈកូរ៉េមានតែ ៨,៥ពាន់លានប៉ុណ្ណោះ ក្លាយជាប្រទេសបរទេសវិនិយោគផ្ទាល់ (FDI) ធំជាងគេនៅវៀតណាម៕