វិស្វកម្មឧស្សាហកម្ម ជំនាញថ្មីមួយ កំពុងមានសន្ទុះសម្រាប់សិស្សចប់បាក់ឌុប

2018-08-15 04:00:50
ព័ត៌មាន

2018-08-15 04:00:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារតែការអភិវឌ្ឍសេដ្ឋកិច្ចប្រកបដោយសន្ទុះ ដែលជំរុញឲ្យមានតម្រូវការខ្លាំងលើជំនាញផ្សេងៗក្នុងវិស័យផលិតកម្ម សាកលវិទ្យាល័យហ្សាម៉ាន់ បានចាប់ផ្ដើមធ្វើការបណ្ដុះបណ្ដាលជំនាញសិក្សាថ្មីពីរ កាលពីឆ្នាំមុន សម្រាប់សិស្សទើបចប់វិទ្យាល័យ គឺជំនាញវិស្វកម្មឧស្សាហកម្ម (Industrial Engineering) និងជំនាញ ភ័ស្តុភារ និងពាណិជ្ជកម្មអន្តរជាតិ (International Trade and Logistics)។

យោងតាម វិទ្យាស្ថានវិស្វករឧស្សាហកម្ម (Institute of Industrial Engineers) ដែលមានទីតាំងនៅប្រទេសអូស្ត្រាលី ជំនាញវិស្វកម្មឧស្សាហកម្ម (Industrial Engineering) គឺជាមែកធាងមួយនៃជំនាញវិស្វកម្ម។ ជំនាញសិក្សាមួយនេះ ផ្ដោតទៅលើ ការបង្កើនប្រសិទ្ធភាព នៅក្នុងសង្វាក់ផលិតកម្មរបស់រោងចក្រសហគ្រាស ប្រព័ន្ធគ្រប់គ្រង និង ប្រតិបត្តិការនៅតាមបណ្ដាក្រុមហ៊ុនធំៗ។

លោក Bayram Annanurov ប្រធានដេប៉ាតឺម៉ង់វិស្វកម្មឧស្សាហកម្ម នៅសាកលវិទ្យាល័យហ្សាម៉ាន់ បានប្រាប់ឲ្យដឹងថា ជំនាញវិស្វកម្មឧស្សាហកម្ម មិនដូចជាជំនាញវិស្វកម្មផ្សេងៗទៀត តួយ៉ាង ជំនាញវិស្វកម្មសំណង់នោះទេ ត្បិតអី ជំនាញមួយនេះ ផ្ដោតសំខាន់លើសង្វាក់ផលិតកម្ម និង ដំណើរការរបស់ក្រុមហ៊ុន សហគ្រាស។

លោក Bayram បានលើកជាឧទាហរណ៍ដោយសាមញ្ញថា វិស្វករផ្នែកឧស្សាហកម្ម អាចជួយឲ្យរោងចក្រផលិតឡាន បង្កើនលទ្ធភាពផលិត ពីចំនួន១០០ ទៅ ១៥០គ្រឿង ដោយមិនចាំបាច់បង្កើនការចំណាយលើធនធានសម្រាប់ផលិត ដូចជាពេលវេលា ហិរញ្ញវត្ថុ និងកម្លាំងពលកម្មជាដើម។

បើទោះជាជំនាញវិស្វកម្មឧស្សាហកម្ម ហាក់ដូចជាថ្មីសម្រាប់សិស្សនិស្សិតកម្ពុជា វាជាជំនាញដែលនិស្សិតជាច្រើនធ្លាប់បានសិក្សានៅតាមសាកលវិទ្យាល័យនានាជុំវិញពិភពលោក ជាពិសេស នៅសហរដ្ឋអាមេរិក ដូចជា សាកលវិទ្យាល័យ California-Berkeley, សាកលវិទ្យាល័យ Stanford, សាកលវិទ្យាល័យរបស់រដ្ឋ Pennsylvania និង វិទ្យាស្ថានបច្ចេកវិទ្យា MIT ជាដើម។

លោក ស៊ូវ ហុក សិស្សនិទ្ទេសAឆ្នាំ២០១៧ ដែលបានជ្រើសរើសជំនាញសិក្សាមួយនេះក្រោយបញ្ចប់វិទ្យាល័យ បានថ្លែងឲ្យដឹងថា ខ្លួនបានជ្រើសរើសយកមុខវិជ្ជានេះ ដោយសារទទួលបានដំបូន្មានពីនិយោជកម្នាក់។ និយោជករូបនោះថ្លែងថា សេដ្ឋកិច្ចប្រទេសកម្ពុជា នឹងលូតលាស់ឆ្ពោះទៅរកការរីកចម្រើនក្នុងវិស័យបច្ចេកវិទ្យា។ ហេតុដូច្នេះហើយ តម្រូវការទីផ្សារការងារក្នុងស្រុក ចំពោះនិស្សិតដែលចប់ពីសាកលវិទ្យាល័យ ជាមួយនឹងចំណេះជំនាញច្បាស់លាស់ តួយ៉ាងដូចជា និស្សិតដែលបញ្ចប់ពីជំនាញវិស្វកម្មឧស្សាហកម្ម នឹងមានការកើនឡើងខ្ពស់។ យោងតាមរបាយការណ៍ ពីទីភ្នាក់ងារជាតិមុខរបរ និងការងារ មុខវិជ្ជាវិស្វកម្មឧស្សាហកម្ម ជាមុខវិជ្ជាលំដាប់លេខ២ ក្នុងចំណោមមុខវិជ្ជាវិស្វកម្មផ្សេងៗទៀត ដែលមានតម្រូវការខ្ពស់ ក្នុងទីផ្សារការងារកម្ពុជានាពេលបច្ចុប្បន្ន។

រូបភាព៖ មុខវិជ្ជាសិក្សា និង ឱកាសការងារ តាមរយៈការសិក្សាជំនាញវិស្វកម្មឧស្សាហកម្ម នៅសាកលវិទ្យាល័យហ្សាម៉ាន់។

លោក ជេត្ថា និស្សិតអាហារូបករណ៍ពីសាកលវិទ្យាល័យហ្សាម៉ាន់ បានប្រាប់ថា និស្សិតដែលរៀនជំនាញសិក្សាមួយនេះ នឹងអាចសិក្សាមុខវិជ្ជាសំខាន់ៗដូចជា System Analysis, Supply Chain Management, Project Management, និង Operations Research និងមុខវិជ្ជាផ្សេងៗទៀតដែលទាក់ទងនឹងផ្នែកធុរកិច្ច ស្ថិតិ ប្រព័ន្ធព័ត៌មានវិទ្យា និងវិស្វកម្មទូទៅ។

ដើម្បីបំពាក់បំប៉ននិស្សិតអោយស្វែងយល់កាន់តែច្បាស់ពីវិស័យវិស្វកម្មឧស្សាហកម្មនេះ និស្សិតនៅសាកលវិទ្យាល័យហ្សាម៉ាន់ ដូចជាជេត្ថា និង មិត្តភក្ដិ ក៏ត្រូវបានផ្ដល់ឱកាសឱ្យចូលរួមក្នុងទស្សនកិច្ចសិក្សា នៅតាមរោងចក្រសហគ្រាស របស់ប្រទេសជឿនលឿន ដូចជា ម៉ាឡេស៊ី និង កូរ៉េជាដើម។

រូបភាព៖ និស្សិតជំនាញវិស្វកម្មឧស្សាហកម្ម សាកលវិទ្យាល័យហ្សាម៉ាន់ ក្នុងដំណើរទស្សនកិច្ចសិក្សានៅក្រៅប្រទេស។

រូបភាព៖ និស្សិតវិស្វកម្មឧស្សហកម្ម កំពុងសិក្សានៅក្នុងLabរបស់សាកលវិទ្យាល័យហ្សាម៉ាន់ គួរបញ្ជាក់ផងដែរថា សាកលវិទ្យាល័យហ្សាម៉ាន់កំពុងបើកឲ្យមានការចុះឈ្មោះប្រឡងអាហារូបករណ៍ ដែលជាប្រភេទអាហារូបករណ៍បញ្ចុះថ្លៃសិក្សាពី២៥% រហូតដល់១០០% សម្រាប់ជំនាញវិស្វកម្មឧស្សាហកម្ម និងជំនាញផ្សេងៗទៀត ហើយការប្រឡងនឹងប្រព្រឹត្តិទៅថ្ងៃសៅរ៍ ទី១ ខែកញ្ញាខាងមុខនេះ។ សម្រាប់សិស្សចប់វិទ្យាល័យនៅឆ្នាំនេះ និងសិស្សដែលបានចប់កាលពីឆ្នាំមុនៗ អាចទាក់ទង

និស្សិតដែលបញ្ចប់ការសិក្សាពីជំនាញវិស្វកម្មឧស្សាហកម្ម អាចទទួលបានការងារពីវិស័យមួយចំនួនដែលនឹងរីកចម្រើននាពេលអនាគត ដូចជា វិស័យកែច្នៃចំណីអាហារ អេឡិកត្រូនិច យានយន្ត និង ភ័ស្តុភារ។ នៅពេលបច្ចុប្បន្ន និស្សិតដែលបានបញ្ចប់ការសិក្សា អាចរំពឹងទទួលបានការងារនៅតាមស្ថាប័នក្នុងវិស័យដែលកំពុងលូតលាស់ ដូចជាធនាគារ មន្ទីរពេទ្យទំនើប សណ្ឋាគារ អាកាសយាន្តដ្ឋាន រោងចក្រសហគ្រាស និងតំបន់សេដ្ឋកិច្ចពិសេសជាដើម។

ចុះឈ្មោះប្រឡងអាហារូបករណ៍ តាមរយៈតំណភ្ជាប់វេបសាយ៖ https://www.zamanu.edu.kh/scholarship_form/

អត្ថបទ៖ ថា ម៉ាលីដា

មតិយោបល់

បច្ចេកវិទ្យា

ភ្ជាប់ទំនាក់ទំនងជាមួយ បច្ចេកវិទ្យា

ពាក្យទាក់ទង