អ្នកនិយមទស្សនាហ្គេមលើ Twitch កុំភ្លេច Follow ជើងខ្លាំង ១០ រូបនេះ ហ្គេមល្បីៗមានគ្រប់សព្វ!

2018-08-13 13:15:17
ចំណេះដឹង

2018-08-13 13:15:17
ចំនួនមតិ 0 | ចំនួនចែករំលែក 0

ចន្លោះមិនឃើញ

Twitch ជាគេហទំព័រមួយប្រមូលផ្តុំដោយការផ្សាយផ្ទាល់ពីបុគ្គលមានជំនាញខាងវិស័យសិល្បៈ ការកម្សាន្ត ក៏ដូចជាអ្នកនិយមលេងហ្គេមមានក្រុមហ៊ុនមេ Amazon នៅឯសហរដ្ឋអាមេរិក។ ដោយសង្កេតឃើញវិស័យហ្គេមកំពុងទទួលបានការគាំទ្រខ្ពស់ Sabay ណែនាំឲ្យស្គាល់ជើងខ្លាំង ១០ រូបលើគេហទំព័រ Twitch មាន Follower ច្រើនបំផុត ចន្លោះពីជាង ២ លានដល់ខ្ទង់ ១០ លាននាក់។

១០.imaqtpie មាន Follower ប្រមាណ ២,៣ លាននាក់:

ជើងខ្លាំងលេងហ្កេម League of Legends រូបនេះជាមធ្យមទទួលការចុចទស្សនាប្រចាំថ្ងៃ ១១ ៧៥៣ ដង ដោយហក់ខ្ពស់បំផុតដល់ជាង ២ មុឺនដង។ រៀងរាល់ថ្ងៃអាទិត្យ Imaqtpie ឧស្សាហ៍ផ្សាយផ្ទាល់រយៈពេល ៦ ម៉ោងចន្លោះពីម៉ោង ៩ យប់ដល់ម៉ោង ២ ទាបភ្លឺ។

៩.ESL_CSGO មាន Follower ប្រមាណ ២,៤ លាននាក់:

ជើងខ្លាំងខាងលេងហ្គេមបាញ់ប្រហារ Couter-Strike: Global Offensive ហាក់ធ្លាក់ចុះខ្លាំងមួយរយៈចុងក្រោយនេះ ដោយជាមធ្យមប្រចាំថ្ងៃមានការចុចទស្សនាក្រោម ១ ពាន់ដង និងខ្ពស់បំផុតត្រឹមជាង ១៨ ០០០ ដង។

៨.TimTheTatman មាន Follower ប្រមាណ ២,៤៩ លាននាក់:

អ្នកលេងហ្គេម Fortnite ហាក់ទទួលបានការគាំទ្រខ្ពស់ ដោយមធ្យមមានការចុចទស្សនាក្បែរ ២៥ ០០០ ដងប្រចាំថ្ងៃ និងខ្ពស់បំផុតដល់ ៤៧ ០០០ ដង។ ប៉ុន្តែក្រៅពីនេះលោកក៏លេងទាំងហ្គេម Realm Royale, Battlefield V ក៏ដូចជា World of Warcraft ជាដើម។

៧.Syndicate មាន Follower ប្រមាណ ២,៥ លាននាក់:

បុរសលេងហ្គេម Minecraft រូបនេះ ហាក់ពុំសូវចេញវីដេអូច្រើនដូចសព្វដងក្នុងមួយរយៈចុងក្រោយ ពោលថ្វីបើទទួលបាន Follower ខ្ទង់លាននាក់ក៏ដោយក្តី ប៉ុន្តែមិនសូវសកម្មដូចបុគ្គលល្បីឈ្មោះឯទៀតឡើយ។

៦.DrDisRespectLIVE មាន Follower ប្រមាណ ២,៦ លាននាក់:

ចំណាយពេលច្រើនលើហ្គេម PUBG, Fortnite ក៏ដូចជា Call of Duty: Black Ops 4 ដោយលោកឧស្សាហ៍ផ្សាយផ្ទាល់ពេលយប់រំលងអធ្រាត្រចន្លោះម៉ោង ១២ រំលងអធ្រាត្រថ្ងៃខ្លះដល់ម៉ោង ៥-៦ ព្រឹក។

៥.Riot Games មាន Follower ប្រមាណ ៣ លាននាក់:

ជើងខ្លាំងខាងហ្គេម LOL ថ្ងៃខ្លះមានការចុចទស្សនាដល់ជាង ១៣០ ០០០ ដង ពោលគឺមួយសប្តាហ៍ចុងក្រោយនេះ ផ្សាយផ្ទាល់ដល់ទៅ ៤៥ ម៉ោងឯណោះ។ ចង់តាមដានការលេងរបស់លោក អាចឆ្លៀតពេលអំឡុងម៉ោង ១២ ទាបភ្លឺ ដល់ម៉ោង ៨ ព្រឹក។

៤.summit1g មាន Follower ប្រមាណ ៣,២៥ លាននាក់:

បុរសរូបនេះលេងហ្គេមចម្រុះមានតាំងពី Fortnite, DayZ, CSGO, Call of Duty: Black Ops 4 ក៏ដូចជា Escape From Tarkov ជាដើម។ ខ្ពស់បំផុតថ្ងៃខ្លះលោកទទួលបានការចុចទស្សនាតែក្បែរ ១៧ ០០០ ដងប៉ុណ្ណោះ។

៣.Shroud មាន Follower ប្រមាណ ៣,៩៩ លាននាក់:

ចន្លោះម៉ោង ៣ ព្រឹក ដល់ម៉ោង ៣ រសៀល អ្នកនឹងនិយមឃើញ Shroud ផ្សាយផ្ទាល់ហ្គេម PUBG ក៏ដូចជា Call of Duty: Black Ops 4 គួបផ្សំការជជែកកម្សាន្តមួយផ្នែកតូច។ ផ្សាយផ្ទាល់ដល់ ៦៨ ម៉ោងនៅសប្តាហ៍ចុងក្រោយ ខណៈការចុចទស្សនាខ្ពស់បំផុតដល់ ៤៦ ០០០ នាក់។

២.TSM_Myth មាន Follower ប្រមាណ ៤ លាននាក់:

មួយសប្តាហ៍ចុងក្រោយជើងខ្លាំងលំដាប់ទី ២ អង្គុយលេងតែហ្គេម Fortnite សុទ្ធសាធ ដោយញឹកញយផ្សាយផ្ទាល់ ៩ ម៉ោងពីចន្លោះម៉ោង ៣ ទាបភ្លឺ ដល់ ១១ ព្រឹក។ ក្រៅពី Fortnite លោកក៏ឆ្លៀតលេង CS:GO, LOL និង Battlefield V ជាដើម។

១.Ninja មាន Follower ប្រមាណ ១០,២ លាននាក់:

ឲ្យតែអ្នកទស្សនាការផ្សាយផ្ទាល់លើ Twitch នរណាៗក៏ស្គាល់ឈ្មោះ Ninja នេះដែរ ក្រៅពីជំនាញលេងហ្គេម ក៏ត្រូវបានស្គាល់ជាបុរសមួយរូបកើបចំណូលក្បែរលានដុល្លារក្នុងមួយខែៗ។ ទទួលបានការចុចទស្សនាខ្ពស់បំផុតដល់ទៅជាង ១៤០ ០០០ ដងប្រចាំថ្ងៃ ដោយមួយថ្ងៃលោកផ្សាយផ្ទាល់ដល់ទៅ ១៦ ម៉ោងអំឡុងថ្ងៃអាទិត្យ ចន្លោះម៉ោង ១០ យប់ ដល់ម៉ោង ១ ភ្លឺ។ ក្រៅពី Fornite លោកក៏ឧស្សាហ៍ឃើញលេងហ្គេមផ្សេងទៀត Realm Royale, Battlefield V, PUBG ក៏ដូចជាការជជែកកម្សាន្តជាមួយអ្នកគាំទ្រ។

ប្រភព: https://www.twitchmetrics.net/channels/follower