កូនស្រីពៅ Steve Jobs ដុងខុសពីឪពុក ពូកែជិះសេះ ហើយសម្រស់បានថែមទៀត

2018-08-09 03:02:06
ព័ត៌មាន

2018-08-09 03:02:06
ចំនួនមតិ 0 | ចំនួនចែករំលែក 0

ចន្លោះមិនឃើញ

Steve Jobs បានជួយជ្រោមជ្រែង Apple រហូតជាប់ឈ្មោះជាក្រុមហ៊ុនមានទ្រព្យតម្លៃ ១ ទ្រីលានដុល្លារ។ ក្រោយមរណភាពរបស់អតីតនាយកប្រតិបត្តិក្រុមហ៊ុនយក្សអាមេរិក ទ្រព្យសម្បត្តិនៃគ្រួសាររបស់លោកបច្ចុប្បន្នមានប្រមាណ ២១,៥ ពាន់លានដុល្លារ ។ នេះបើយោងតាមរបាយការណ៍ពី Forbes។

Steve មានកូនស្រី ៣ នាក់ និងកូនប្រុស ១ នាក់។ Sabay នឹងធ្វើការបង្ហើបជីវិតខ្លះៗនៃកូនស្រីពៅវ័យ ២០ ឆ្នាំរបស់ Steve Jobs មានឈ្មោះ Eve Jobs។

Eve Jobs បច្ចុប្បន្នកំពុងសិក្សានៅសកលវិទ្យាល័យល្បីបំផុតលំដាប់ទី ៥ របស់ពិភពលោក Stanford University ក៏ជាសាលាដែលឪពុកម្តាយរបស់នាងបានជួបគ្នា។ នាងត្រៀមបញ្ចប់ការសិក្សានាឆ្នាំ ២០២១។ បើផ្អែកតាមជីវប្រវត្តិបង្ហោះក្នុងគណនី Instagram។

ទេពកោសល្យពិសេសរបស់ Eve Jobs គឺកីឡាជិះសេះ ដោយកាលពីខែឧសភាឆ្នាំមុន នាងធ្លាប់ឈ្នះពានរង្វាន់ CSI 3 Grand Prix នៅ Split Rock Jumping Tour ក្នុងរដ្ឋ Kentucky សហរដ្ឋអាមេរិក ជាមួយទឹកប្រាក់ ១៣០ ០០០ ដុល្លារ។ នាខែសីហាឆ្នាំដដែល នាងក៏បានផ្តួលជើងខ្លាំងអ្នកជិះសេះឯទៀត រហូតទទួលប្រាក់រង្វាន់ ១០០ ០០០ ដុល្លារ ក្នុងការប្រកួតមួយនៅប្រទេសកាណាដា។

Beautiful training day with @new.kells.farm and Voltaire ?

A post shared by Eve Jobs (@evecjobs) on Apr 20, 2018 at 2:28pm PDT

នាងធ្លាប់បញ្ជាក់ក្នុងកិច្ចសម្ភាសន៍មួយកាលពីឆ្នាំ ២០១៦ ដូច្នោះថា៖ "វាជាការល្អណាស់ក្នុងការមើលឃើញពីការខិតខំប្រឹងប្រែង ប៉ុន្តែអ្នកត្រូវតែស្ថិតក្នុងកម្រិតកំពូលមួយក្នុងការប្រកួត ដោយវាក៏បានបង្រៀនខ្ញុំពីភាពឯករាជ្យ ការលះបង់និងការព្យាយាមដែលខ្ញុំអាចអនុវត្តបានទៅគ្រប់ជ្រុងនៃជីវិតរបស់ខ្ញុំ"។

ជំនាញជិះសេះរបស់កូនស្រីស្ថាបនិក Apple ក៏មានការប្រកួតប្រជែងជាមួយកូនស្រីស្ថាបនិក Microsoft លោក Bill Gate ដោយក្មេងស្រី Jennifer វ័យ ២១ ឆ្នាំក៏មានទេពកោសល្យក្នុងវិស័យកីឡាប្រណាំងសេះនេះដូចគ្នា។

ក្រឡេកទៅអ្នកស្រី Laurene Powell Jobs ភរិយារបស់លោក Steve Jobs កាលពីឆ្នាំ ២០១៦ កន្លងទៅក៏ធ្លាប់បានរាយការណ៍ថាចំណាយប្រាក់ប្រមាណ ១៥,៣ លានដុល្លារ ទិញដីទំហំ ៣,៥ Acre (រង្វាស់ដីអង់គ្លេស) បើកកសិដ្ឋានចិញ្ចឹមសត្វនៅរដ្ឋ Florida។

គួរបញ្ជាក់ថា លោក Jobs បានទទួលមរណភាពនាថ្ងៃទី ៥ តុលា ឆ្នាំ ២០១១ ដោយសារជំងឺមហារីក។