ទម្លាប់អាក្រក់ទាំង ៦ បំផ្លាញម៉ាស៊ីនកុំព្យូទ័រទាំងមិនដឹងខ្លួន

2018-07-21 01:43:45
ចំណេះដឹង

2018-07-21 01:43:45
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្មានអ្វីឋិតថេរនោះទេ ជាពិសេសបច្ចេកវិទ្យា មានការវិវត្តទៅមុខជានិច្ច តែកុំព្យូទ័រអាចប្រើបានយូរប្រហែល ពីរ ទៅ បីឆ្នាំដែរ បើអ្នកប្រើដោយមានការថែទាំ។

បើ Laptop ទិញប្រើឆាប់ខូច ក្នុងនោះក៏អាចពាក់ព័ន្ធនឹងទម្លាប់ប្រើប្រាស់របស់អ្នកផងដែរ។

ជៀសវាងទុកដាក់ Laptop លើពូក ឬខ្នើយ (កើនកម្ដៅពេលប្រើ)

កម្ដៅជាសត្រូវចម្បងរបស់គ្រឿងអេឡិចត្រូនិក ក្នុងនោះក៏មានកុំព្យូទ័រផងដែរ។ បើកុំព្យូទ័រក្ដៅពេក អាចកាត់បន្ថយអាយុសមាសធាតុខាងក្នុង ដូចជា Processor, កង្ហារ និងថ្ម។

សម្រាប់កុំព្យូទ័រ Desktop គួរសម្អាតធូលីដី ម្ដងម្កាលជាមួយប្រដាប់ផ្លុំខ្យល់ ហើយកុំដាក់ក្នុងទូរតូច ព្រោះត្រូវការលំហូរខ្យល់ចេញចូល កុំឲ្យជាប់គាំងដោយសារទីតាំងចង្អៀត។ អាចការពារធូលីដីបាន ដោយដាក់ផ្ទាល់ផ្ទៃរាប ហើយប្រើ Filter នៅច្រកខ្យល់ចូលរបស់កង្ហារ។

Laptop ងាយស្រួលយកតាមខ្លួនប្រើប្រាស់នៅទីតាំងផ្សេងៗ ហើយក៏អាចបង្កើតទម្លាប់អាក្រក់ជាច្រើនផងដែរ ដូចជាដាក់កល់លើខ្នើយ ឬផ្ទៃក្រណាត់។ នេះបានរាំងខ្ទប់លំហូរខ្យល់នៅខាងក្រោម Laptop។ ប្រើ Laptop នៅលើផ្ទៃរាបស្មើ ធ្វើយ៉ាងណាកុំឲ្យមានអ្វីនៅពីក្រោមរាំងខ្ទប់លំហូរខ្យល់។

មិនគួរដាក់កុំព្យូទ័រចោលក្នុងទីតាំងហប់ក្ដៅ ដូចជាក្នុងរថយន្តត្រូវថ្ងៃ និងធ្វើការសម្អាតធូលីដីម្ដងម្កាល ជាមួយប្រដាប់ផ្លុំខ្យល់។ ទាំងនេះ អាចជួយបង្កើនអាយុប្រើប្រាស់កុំព្យូទ័របាន។

កាន់ប្រើ Laptop ដោយមិនប្រយ័ត្នប្រយែង

Desktop នៅតែលើតុមិនសូវជាបញ្ហានោះទេ ប៉ុន្តែ Laptop លើកចុះឡើងច្រើន។ ធ្លាប់ឃើញ អ្នកខ្លះកាន់ Laptop ផ្លាស់ទីទាំងដែលផ្នែកអេក្រង់នៅបើក នេះអាចធ្វើឲ្យបរិវេណត្រចៀកបិទបើក តឹង ហើយបើដើរប៉ះតុ ឬធ្លាក់អី ដឹងតែអង្គុយមើលហើយ។ មួយចំនួនទៀត ប្រើ Laptop បានបិទត្រឹមត្រូវ តែបែរជាយកកល់ភេសជ្ជៈទៅវិញ។

បើ Laptop ប្រើ Hard Drive ពីមុន (មិនមែន SSD) ការរង្គើ ឬកន្ត្រាក់កុំព្យូទ័រ ជាពិសេសកំពុងដំណើរការ តិច ឬច្រើនអាចធ្វើឲ្យប៉ះពាល់ដល់ Disk ហើយកាន់តែអាក្រក់ ទិន្នន័យសំខាន់ៗក្នុងនោះប្រហែលលាអ្នកហើយ បើមិនបាន Backup ទិន្នន័យទុក។ Laptop ទិញមកថ្លៃ គួរប្រើដោយយកចិត្តទុកដាក់។

ទុកដល់អស់បានសាកថ្មឡើងវិញ

ថ្ម Laptop ម៉ូដែលទំនើបៗបច្ចុប្បន្ន អាចដល់ ឬលើសពី ៨ ម៉ោង ពេលទិញប្រើដំបូង តែនេះមិនបានយូររហូតនោះទេ កម្រិតកាន់ថាមពលថ្ម នឹងថយចុះ ក្រោយប្រើពីរ ទៅបីឆ្នាំ។

ការប្រើថាមពលថ្មដល់ ០% នឹងធ្វើឲ្យកម្រិតកាន់ថ្មថមថយ ស្រួលមិនស្រួលលែងកាន់តែម្ដង (ខូច)។

ចំណុចល្អ គួរប្រើថាមពលថ្មកុំឲ្យដល់អស់រលីង ហើយសាកប្រើតាមតម្រូវការ។ កុំបារម្ភត្រឹមរយៈពេលធ្វើដំណើរលើរថយន្ត ឬយន្តហោះ មិនធ្វើឲ្យថ្មអស់នោះទេ។

មិនយកទុកចិត្តដាក់លើសុវត្ថិភាពចរន្តភ្លើង

Power Supply ក្នុងម៉ាស៊ីន PC មានការការពារកើនចរន្តភ្លើងដែរ តែមិនទាន់គ្រប់គ្រាន់នោះទេ ដែលត្រូវការប្រ៊ីមានមុខងារការពារកើនចរន្ត (Surge protector) ប៉ុន្តែគួរផ្លាស់ប្ដូរចេញរាល់បី ទៅ ប្រាំឆ្នាំ ដោយសារសមត្ថភាពការពារនឹងថមថយ ឬគ្មានតែម្ដង។

គួរដឹងថា Surge protector ត្រឹមអាចការពារកើនចរន្តតិចតួចប៉ុណ្ណោះ ជួយបង្កើនអាយុ PC។ បើមានថវិកាគ្រប់គ្រាន់ អាចវិនិយោគលើ UPS (Uninterruptible power supply) បាន ដែលផ្ទុកថាមពល ការពារ PC កុំឲ្យរលត់ភ្លាមៗ និងការបាត់បង់ទិន្នន័យ កំឡុងពេលដាច់ចរន្តអគ្គិសនី។

ខ្សែសាកថ្ម Laptop មានការផ្លាស់ទីញឹកញាប់ជាង Desktop ដែលត្រូវមានការយកចិត្តទុកដាក់ខ្ពស់ ប្រាកដថាខ្សែមិនដាក់លើជញ្ជាំង បត់ គួចចូលគ្នាតឹងពេកនោះទេ។ ទាំងនេះ អាចធ្វើឲ្យខ្សែខូចចម្លងចរន្តមិនត្រឹមត្រូវ អាចដល់ថ្នាក់ឆេះបាន។

ខ្ជះខ្ជាយពេលវេលាលើការថែទាំមិនចាំបាច់

ជំនាន់ប្រព័ន្ធប្រតិបត្តិការខុសគ្នា ការថែទាំក៏មានភាពខុសគ្នា តែបច្ចុប្បន្ន ត្រឹម ការលុប File មិនសំខាន់ៗចេញ អាចបង្កើនល្បឿនប្រើប្រាស់ម៉ាស៊ីនបាន។

ការសម្អាត Registry ស្ទើរតែអត់ន័យ ហើយបើលុបចំ Registry ត្រូវការប្រើវិញ ដឹងតែបង្កបញ្ហាកាន់តែច្រើន។

បើចង់សម្អាត Hard Drive ប្រើតែកម្មវិធី Disk Cleanup មានស្រាប់របស់ Windows ហើយលុបរឿង តន្ត្រី និង File ធំមិនត្រូវការប្រើចោល។ ហើយបើនៅតែយឺតទៀត សាកល្បងលុបកម្មវិធីដំណើរការពេលបើកប្រព័ន្ធ (Startup) បើនៅតែមិនលឿន ប្រហែលត្រូវផ្លាស់ប្ដូរ Hardware។

បើកវេបសាយមិនបានការពារ

វេបសាយមានច្រើន ផ្ដល់ទាំងចំណេះដឹង ប្រយោជន៍នានា ហើយក៏មានមេរោគផងដែរ ដែលតម្រូវមានកម្មវិធីកម្ចាត់មេរោគការពារកុំព្យូទ័រ។

Windows Defender របស់ Microsoft មានមុខងារល្អគ្រប់គ្រង ជួយការពារបាន។ បើចង់បានការការពារលើសនឹងទៀត អាចសាក Malwarebytes Anti-Malware បាន។

ក្រៅពីនេះ មានការអនុវត្តគួរយកចិត្តទុកដាក់ ដោយរក្សាកម្មវិធីអាប់ដេតជានិច្ច ទាំង Windows និងកម្មវិធីកំពុងប្រើ (តែនេះ ប្រហែលពិបាកបន្តិច ព្រោះភាគច្រើនប្រើទាំង Windows និងកម្មវិធី Cracked)។ គួរប្រើកម្មវិធីគ្រប់គ្រងពាក្យសម្ងាត់ល្អៗ និងគួរយកចិត្តទុកដាក់លើតំណរភ្ជាប់នីមួយៗមុនពេកចុច៕