911 Carrera T ស្រាលជាងមុន តែជាន់ដូចព្យុះមិនបាច់ភ័យគ្រវីគ្រវាត់

2018-07-10 00:15:00
ផលិតផលថ្មី

2018-07-10 00:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Porsche បានបញ្ចេញរថយន្តស្ព័រជំនាន់ថ្មី 911 Carrera T ដែលអភិវឌ្ឍរូបរាងចេញពី 911 T ជារថយន្តកេរដំណែលដែល Porsche បានចេញលក់អំឡុងចុងទសវត្សរ៍ឆ្នាំ ១៩៦០។ សប្ដាហ៍មុនក្រុមហ៊ុនផលិតឡានរបស់អាល្លឺម៉ង់ ទើបតែហៅអ្នកសារព័ត៌មានមកពីប្រទេសក្នុងប្លុកអាស៊ាន តេស្តបើកបរដោយប្រើប្រាស់ដងវិថីក្នុងទីក្រុងប្រទេសដែនកោះសិង្ហបុរីជាទីលានបើកសាកល្បងផ្ទាល់ ដោយមានការបើកកាត់ទីក្រុង ទីប្រជុំជន និងតំបន់សំខាន់ៗនៃប្រទេសខ្លាសេដ្ឋកិច្ចអាស៊ីនេះ។

រំលេចដោយពណ៌លឿងស្រស់យ៉ាងពិសេស ទាំងការដេគ័រផ្នែកខាងក្នុងនិងខាងក្រៅយ៉ាងល្អឥតខ្ចោះស័ក្កសមតម្លៃម៉ាករថយន្តល្បីនេះ។ គន្លឹះទ្វារបិទបើកខាងក្នុង ត្រូវបានរចនាជាខ្សែទាញដូចប្រភេទឡានប្រណាំង។ កៅអីទាំងអ្នកបើកបរនិងអ្នករួមដំណើរ រចនាបន្ថែមឡូហ្គោ 911 ពណ៌លឿងជាអត្តសញ្ញាណរថយន្តនេះ។ Porsche Carrera T ជារថយន្តដែលប្រើប្រព័ន្ធបញ្ជាដោយកង់ក្រោយ ជាជម្រើសស្តង់ដានៃត្រកូល 911 Carrera។

Porsche 911 Carrera T គឺសម្រាប់អ្នកដែលចូលចិត្តរថយន្តប្រភេទស្ព័រម៉ាស៊ីនកម្លាំងខ្លាំង សម្រាប់បើកបរលក្ខណៈកម្សាន្តអារម្មណ៍ (Touring)។ បានអភិវឌ្ឍទម្ងន់ស្រាលជាងជំនាន់ត្រកូល 911 ផ្សេងទៀត ត្រឹម ១ ៤២១ គីឡូក្រាម។ ទម្ងន់តួស្រាលជាងមុនពិតមែន តែមិនបាច់ភ័យទេទោះបីបើកក្នុងល្បឿនលឿនដល់កុងទ័រ ១០០ គឺមិនគ្រវីគ្រវាត់ចាញ់ខ្យល់នោះទេ ដោយសារវាមានប្រព័ន្ធទប់លំនឹងបានយ៉ាងល្អ។ សន្ទុះល្បឿនអាចជាន់ពី ០ ទៅ ១០០ ប្រើពេលត្រឹម ៤.៥ វិនាទីប៉ុណ្ណោះ និងអាចរត់ដល់ល្បឿនអតិបរមា ២៩១ គីឡូម៉ែត្រ/ម៉។

Porsche 911 Carrera T បានបំពាក់ម៉ាស៊ីន Boxer ៣.០Twin-Turbocharged កម្លាំង ៣៧០ សេះ។ កម្រិតស៊ីសាំង ១០០ គីឡូម៉ែត្រ ស៊ីប្រហែល ៩ លីត្រ។ ត្រកូលនេះបានប្រើប្រាស់ប្រព័ន្ធហ្រ្វាំង Porsche Ceramic Composite Brake (PCCB) ជាប្រភេទសេរ៉ាមិច មានទម្ងន់ស្រាល អាចឱ្យរថយន្តចាប់ហ្វ្រាំងឈប់ង៉ក់ជាប់ ទោះកំពុងរត់ក្នុងល្បឿនលឿនយ៉ាងណាក៏ដោយ។

រថយន្តប្រភេទពីរកៅអីរបស់ Porsche នេះ ក៏មានពោងសុវត្ថិភាពទាំងអ្នកបើកបរ និងអ្នករួមដំណើរនៅខាងមុខ រួមទាំងប្រព័ន្ធការពារការបុកទង្គិចពីចំហៀង Side Impact Protection System (POSIP)។ វាបានភ្ជាប់ប្រព័ន្ធភ្លើង Dynamic Light System (PDLS) ដែលអាចសារ៉េពន្លឺបត់បែនទៅតាមស្ថានភាពផ្លូវ។

Porsche 911 Carrera T តម្លៃចាប់ពី ១១០ ០០០ ដុល្លារ។ ព័ត៌មានបន្ថែមអាចទាក់ទងក្រុមហ៊ុន Precision Cambodia ដែលនាំចូលចែកចាយផ្តាច់មុខរថយន្ត Porsche ក្នុងប្រទេសកម្ពុជា៕

អត្ថបទ៖ ប៊ុណ្ណារ៉ា