មានមូលហេតុ អ្នករៀនជំនាញព័ត៌មានវិទ្យា ត្រូវចាយលុយរៀនក្រៅបន្ថែម

2018-06-28 03:29:24
ព័ត៌មាន

2018-06-28 03:29:24
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតដែលសិក្សាជំនាញព័ត៌មានវិទ្យាមួយចំនួនតែងតែមានផលពិបាកនូវមុខវិជ្ជាសរសេរកូដ ត្រូវទាមទាឲ្យមានចំណោះដឹងភាសាអង់គ្លេស គណិតវិទ្យាជា ត្រូវមានការស្រាវជ្រាវច្រើន គួបផ្សំជាមួយចំណងចំណូលចិត្ត។

និស្សិតគួរចំណាយទឹកប្រាក់និងពេលវេលាទៅសិក្សាបន្ថែមទៀតនៅតាមសាលាឯកជនឬទេដើម្បីបន្ថែមចំណោះដឹង?

ឆ្លើយតបនិងសំណួរនេះលោក ឆុន វាសនា ជាអនុប្រធាននាយកដ្ឋានបច្ចេកទេស វិទ្យុជាតិកម្ពុជា ទទួលបន្ទុក ICT នៃក្រសួងព័ត៌មាន និងជាសាស្ត្រាចារ្យផ្នែកព័ត៌មានវិទ្យានៃវិទ្យាស្ថានស៊ីតិចបានប្រាប់ Sabay ថាការសិក្សាបន្ថែមក្រៅមហាវិទ្យាល័យវាជារឿងដែលល្អមួយសម្រាប់និស្សិតដែលរៀនផ្នែកនេះ។

ជាក់ស្ដែងពេលនិស្សិតកំពុងសិក្សានៅក្នុងថ្នាក់រៀនមិនប្រាកដថាពូកែគ្រប់មុខនេះទេ ដូចនេះពួកគេត្រូវស្វែងរកសាលារៀនបន្ថែមត្រងចំណុចខ្វះខាតផ្នែកណាមួយដើម្បីបំពេញចំណោះដឹងបន្ថែម ។ លើសពីនេះក៏ត្រូវមានការស្រាវជ្រាវបន្ថែមនៅតាមប្រព័ន្ធអ៊ីនធឺណិត ព្រោះអ្វីដែលថ្មីសម្រាប់ផ្នែកព័ត៌មានវិទ្យាអាចស្វែងរកបានតាមតម្រូវការ។

ងាកមកនិស្សិតជំនាញព័ត៌មានវិទ្យាម្នាក់លោក ភារម្យ ក៏បានចំណាយប្រាក់និងពេលវេលាទៅសិក្សាក្រៅពីថ្នាក់ដែរ " ព្រោះថាជំនាញព័ត៌មានវិទ្យាបើចង់ពូកែត្រូវតែរៀននៅខាងក្រៅទៀត ក្នុងមហាវិទ្យាល័យគេរៀនតែទ្រឹស្ដីទេ ឯការអនុវត្តន៍តិចបើរៀននៅក្រៅអនុវត្តន៍បានច្រើនធ្វើឲ្យយើងចាប់ទទួលបានអ្វីដែលថ្មីជាងនៅសាលា "។

លោកបន្តទៀតថានិស្សិតរៀនផ្នែកព័ត៌មានវិទ្យាទាំងអស់ប្រសិនបើចង់ចេះឱ្យរឹតតែច្បាស់នោះ គួរតែស្វែងរកសាលារៀនក្រៅបន្ថែម ឬគ្នាជាក្រុមដើម្បីឲ្យអ្នកពូកែជាងខ្លួនជួយបង្រៀនបន្ថែម។

ចំណែកលោក ផេន អតីតនិស្សិតផ្នែកព័ត៌មានវិទ្យាមួយរូបបានផ្ដល់ជាយោបល់ថាការរៀនក្រៅបន្ថែមជារឿងល្អ តែបើពួកគេមិនមានលទ្ធភាពបងសាលារៀនបន្ថែមទេនេះទើបជាបញ្ហា។

លោកក៏បានប្រាប់បទពិសោធន៍មួយចំនួនដែលលោកធ្លាប់ជួបប្រទះ " អ្នកដែលមិនមានលុយគ្រប់គ្រាន់បងថ្លៃសាលារៀនក្រៅបន្ថែម គួរចំណាយពេលរកការងារធ្វើ ដែលទាក់ទងនិងជំនាញដែលកំពុងរៀនដើម្បីបង្កើនចំណោះដឹង លើសពីនេះក៏អាចទទួលបានប្រាក់ខែតិចតួចផងដែរ " ។

លោកបន្តថាសម័យឥលូវអ្នករៀនជំនាញនេះសឹងតែ ៧០% ហើយដែលត្រូវរកសាលារៀនក្រៅបន្ថែមពុំដូចនោះទេច្បាស់រៀនមិនទាន់គេឡើយ។

បើតាមលោក ឌី ជាគ្រូបង្រៀនផ្នែកកុំព្យូទ័រម្នាក់បានប្រាប់ថាការសិក្សាជំនាញ ព័ត៌មានវិទ្យាមិនមែនជាការងាយស្រួលទេ ដូចនេះរាល់និស្សិតទាំងអស់ត្រូវមានឆន្ទៈ ចំណងចំណូលចិត្ត ក្នុងការសិក្សាចូលរួមពីទ្រឹស្ដីផ្សារភ្ជាប់ជាមួយការអនុវត្តទើបរៀនជំនាញនេះឆាបទទួលយកបាន ។

ងាកមកវិញបើអ្នកមិនមានចំណងចំណូលចិត្តទេពកោសល្យផ្នែកនេះហើយ ទោះចំណាយប្រាក់ទៅសិក្សានៅសាលាល្អ ឬក្រៅបន្ថែមក៏គ្មានប្រយោជន៍ដែរ។

យើងដឹងហើយថាការសិក្សាជំនាញព័ត៌មាននៅតាមមហាវិទ្យាល័យមិនអាចបំពេញតម្រូវការដល់និស្សិតឱ្យបានគ្រប់ ជ្រុងជ្រោយបានទេ ព្រោះថាមុខវិជ្ជានៃឯកទេសនិមួយៗមានការច្របាច់បញ្ចូលគ្នា គួបផ្សំជាមួយពេលវេលាតិចតួចផងនោះ។

ចំណែកឯការសិក្សានៅតាមសាលាឯកជនផ្សេងៗវិញគឺនិស្សិតអាចជ្រើសរើស ឯកទេសរបស់ខ្លួនតាមចិត្តចង់ គួបផ្សំជាមួយពេលវេលាអនុវត្តន៍បានច្រើន។