• 2018-04-30 08:23:27
  • ប្រវត្តិបច្ចេកវិទ្យា

បណ្ដាក់​​ទុន​ ២០ លាន​ដុល្លារ​លើ​ Alibaba ​បាន​មក​វិញ​ ៦០ ពាន់​លាន​ដុល្លារ​

  • 2018-04-30 08:23:27
  • ចំនួនមតិ 0 | ចំនួនចែករំលែក 0

ចន្លោះមិនឃើញ

និយាយ​ដល់​​ SoftBank Group មនុស្ស​មួយ​ចំនួន​ប្រហែល​ជា​ស្គាល់​ជា​ក្រុមហ៊ុន​ជប៉ុន​ដ៏​ធំ​មួយ​​ដែល​កាន់​កាប់​ភាគហ៊ុន​នៅ​ក្នុង​ក្រុមហ៊ុន​ធំៗ​ជា​ច្រើន​ ដោយ​ក្នុង​នោះ​ភាគ​ច្រើន​ជា​ក្រុមហ៊ុន​ផ្នែក​បច្ចេកវិទ្យា។

លោក Masayoshi Son

SoftBank បង្កើត​ឡើង​នៅ​ឆ្នាំ​ ១៩៨១ ដោយ​លោក​ Masayoshi Son។ ក្នុង​​​រយៈពេល​ ៣៦ ឆ្នាំ​ ​ក្រុមហ៊ុន​បាន​បណ្ដាក់​ទុន​លើ​ក្រុមហ៊ុន​ជា​ច្រើន​ និង​ទទួល​បាន​ផល​ចំណេញ​ច្រើន​មិន​ស្ទើរ​នោះ​ដែរ។ ត​ទៅ​នេះ​នឹង​បង្ហាញ​ត្រួស​ៗ​ពី​ក្រុមហ៊ុន​ដែល​ SoftBank ​មាន​ចំណែក​ជា​ម្ចាស់​ភាគហ៊ុន ៖

  • នៅ​ឆ្នាំ​ ២០០០ ក្រុមហ៊ុន​ SoftBank សម្រេច​បាន​ការ​បណ្ដាក់​ទុន​ដ៏​ជោគជ័យ​ខ្លាំង​របស់​ខ្លួន​ ដោយ​បាន​បណ្ដាក់​ទុន​ ២០ លាន​ដុល្លារ​ លើ​ក្រុមហ៊ុន​លក់​ទំនិញ​អនឡាញ​ Alibaba។ ទឹក​ប្រាក់​ដែល​បណ្ដាក់​ទុន​នេះ​បាន​ក្លាយ​ទៅ​ជា​ ៦០ ពាន់​លាន​ដុល្លារ​ នៅ​ពេល​ក្រុមហ៊ុន​ Alibaba ដាក់​លក់​ហ៊ុន​ជា​សាធារណៈ​នៅ​ឆ្នាំ​ ២០១៤។
  • នៅ​ថ្ងៃ​ទី​ ១៧ ខែ​មេសា​ ឆ្នាំ​ ២០០៦ SoftBank បាន​ប្រកាស​ថា​យល់​ព្រម​ទិញ​យក​ក្រុមហ៊ុន​ផ្ដល់​សេវា​ទូរសព្ទ​ Vodafone Japan ប្រចាំ​ប្រទេស​ជប៉ុន​ ដោយ​មិន​បាន​បញ្ចេញ​តម្លៃ​នោះ​ទេ និង​បាន​ប្ដូរ​ឈ្មោះ​​ពី​ Vodafone Japan ទៅ​ជា​ SoftBank Mobile វិញ។
  • នៅ​ខែ​​កុម្ភៈ​ ឆ្នាំ​ ២០១០ បាន​ទិញ​យក​ភាគហ៊ុន​ ១៣,៧% ​ពី​ក្រុមហ៊ុន​ផ្ដល់​សេវា​ Live វីដេអូ​​របស់​អាមេរិក​ ឈ្មោះ​ Ustream និង​មាន​បំណង​ថា​ដំឡើង​ភាគហ៊ុន​ដល់​ ៣០% នៅ​ខែ​កក្កដា​ ឆ្នាំ​ ២០១១។
  • នៅ​ខែ​កក្កដា ​ឆ្នាំ ២០១៣ ​គណៈកម្មការ​សហព័ន្ធ​ទូរគមនាគមន៍​បាន​អនុញ្ញាត​លើ​សំណើ​​​​របស់​ SoftBank លើ​​ការ​​សុំ​ទិញ​​ភាគ​ហ៊ុន​ក្រុមហ៊ុន​ផ្ដល់​សេវា​ទូរសព្ទ​​​​អាមេរិក​ Sprint ​ក្នុង​តម្លៃ​ ២២,២ ពាន់​លាន​ដុល្លារ​ សម្រាប់​ភាគហ៊ុន​ ៧៨%។ នៅ​ខែ​សីហា​ ឆ្នាំ​ ២០១៣ SoftBank បាន​ទិញ​ភាគហ៊ុន​របស់​ Sprint ចំនួន​ ២% ទៀត ​ធ្វើ​ឲ្យ​ភាគហ៊ុន​សរុប​ឡើង​ដល់​ ៨០%។
  • ​​​​​​ខែ​តុលា​ ឆ្នាំ​ ២០១៣ ដដែល​ SoftBank បាន​ទិញ​យក​ភាគហ៊ុន​ក្រុមហ៊ុន​ផលិត​ហ្គេម​ Supercell ចំនួន​ ៥១% ស្មើ​នឹង​ ២,១ ពាន់​លាន​ដុល្លារ ។ ក្រោយ​មក​ទៀត​នៅ​ខែ​មិថុនា​ ឆ្នាំ​ ២០១៥ SoftBank បាន​ទិញ​យក​ភាគហ៊ុន​ ២២,៧% ទៀត​របស់​ Supercell និង​បាន​ក្លាយ​ជា​ម្ចាស់​ភាគហ៊ុន​ស្នូល​ដ៏​សំខាន់​មួយ។ ប៉ុន្តែ​នៅ​ខែ​មិថុនា​ ឆ្នាំ​ ២០១៦ SoftBank បាន​លក់​ភាគហ៊ុន​ ៨៤% នៃ​ភាគហ៊ុន​សរុប​របស់​ Supercell ដែល​ខ្លួន​មាន​ ទៅ​ឲ្យ​ក្រុមហ៊ុន​ Tencent ក្នុង​ទំហំ​ទឹក​ប្រាក់​ ៧,៣ ពាន់​លាន​ដុល្លារ ។​
  • SoftBank ក៏​បាន​បណ្ដាក់​ទុន​ ២១០ លាន​ដុល្លារ​ លើ​ក្រុមហ៊ុន​​ផ្ដល់​សេវា​ដឹក​ជញ្ជូន​អនឡាញ​របស់​ឥណ្ឌា​ ឈ្មោះ​ OlaCabs និង​បាន​ចាយ​ ៦២៧ លាន​ដុល្លារ​ ទិញ​យក​ភាគហ៊ុន​ ៣០% ពី​ក្រុមហ៊ុន​លក់​ទំនិញ​របស់​ឥណ្ឌា​ ឈ្មោះ​ Snapdeal។
  • ​​ចូល​ដល់​ខែ​​មីនា​ ឆ្នាំ​ ២០១៧ ​គេ​បាន​ដឹង​ថា​ SoftBank ចង់​បណ្ដាក់​ទុន​ប្រមាណ​ ៦ ពាន់​លាន​ដុល្លារ​​ លើ​ក្រុមហ៊ុន​ Didi Chuxing Technology ដើម្បី​ជួយ​ឲ្យ​ក្រុមហ៊ុន​នេះ​ពង្រីក​ខ្លួន​លើ​បច្ចេកវិទ្យា​ រថយន្ត​បើក​ដោយ​គ្មាន​មនុស្ស។
  • នៅ​ខែ​​ឧសភា​ ឆ្នាំ​ ២០១៧ SoftBank ​បាន​បណ្ដាក់​ទុន​ ១,៤ ពាន់​លាន​ដុល្លារ​ លើ​ក្រុមហ៊ុន​ទូរទាត់​អនឡាញ​ Paytm របស់​ឥណ្ឌា និង​នៅ​ខែ​សីហា បាន​បណ្ដាក់​ទុន​ ២,៥ ពាន់​លាន​ដុល្លារ​ លើ​ក្រុមហ៊ុន​ Flipkart របស់​ឥណ្ឌា​ដដែល។
  • នៅ​ខែ​វិច្ឆិកា​ ឆ្នាំ​ ២០១៧ SoftBank សម្រេច​បណ្ដាក់​ទុន​ ១០ ពាន់​លាន​ដុល្លារ​ ទៅ​ក្នុង​ Uber ជា​មួយ​ភាគហ៊ុន​ ១៥%៕​

ប្រភព៖ Wikipedia ប្រែ​សម្រួល៖ សុខហេង

មតិយោបល់