- 2018-04-28 03:37:00
- ព័ត៌មាន
កម្ពុជា នឹងមានរោងចក្រផលិតគ្រឿងផ្គុំកង់ បើគម្រោងនេះជោគជ័យ
- 2018-04-28 03:37:00
- ចំនួនមតិ 0 | ចំនួនចែករំលែក 0
កម្ពុជា នឹងមានរោងចក្រផលិតគ្រឿងផ្គុំកង់ បើគម្រោងនេះជោគជ័យ
ចន្លោះមិនឃើញ
ក្រុមហ៊ុនផលិតកង់របស់អាមេរិក និងចិនតៃប៉ិ ដែលបានបណ្តាក់ទុននៅកម្ពុជា មានបំណងពង្រីកការវិនិយោគលើការផលិតគ្រឿងបង្គុំផ្សេងៗ សម្រាប់ដំឡើងកង់ដែលមានលក្ខណៈពេញលេញ ជាផលិតផលសុទ្ធ ១០០% របស់កម្ពុជា (Made in Cambodia) ដើម្បីនាំចេញទៅកាន់ទីផ្សារអន្តរជាតិ។
គម្រោងនេះ ត្រូវបានបង្ហើបនៅក្នុងជំនួបពិភាក្សា រវាងលោក Robert Margevicius តំណាងក្រុមហ៊ុននិងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា កាលពីរសៀលថ្ងៃទី២៤ ខែមេសា ឆ្នាំ២០១៨ នៅទីស្តីការក្រសួងពាណិជ្ជកម្ម។
លោក Robert Margevicius បាននិយាយថា កម្ពុជាបានក្លាយជាប្រទេសដំឡើង និងផលិតនាំចេញកង់ធំបំផុតលំដាប់ទី២នៅលើពិភពលោក ដែលមានចំណែកទីផ្សារនៅសហគមន៍អឺរ៉ុប សហរដ្ឋអាមេរិក កាណាដា អាស៊ាន និងប្រទេសអាស៊ីផ្សេងទៀត ក៏ប៉ុន្តែកម្ពុជាពុំមានរោងចក្រផលិតគ្រឿងបង្គុំកង់នៅឡើយ គឺត្រូវនាំចូលពីប្រទេសផ្សេងៗ។
ជាមួយគ្នានេះ លោក Robert Margevicius បានស្នើសុំឲ្យក្រសួងពាណិជ្ជកម្ម ជួយគាំទ្រគម្រោងនេះ ដើម្បីក្រុមហ៊ុនទាំងអស់ អាចចូលរួមធ្វើពិពិធកម្មវិស័យការងារ និងអភិវឌ្ឍសេដ្ឋកិច្ចជាមួយរាជរដ្ឋាភិបាលកម្ពុជា។
ជាការឆ្លើយតប លោក ប៉ាន សូរស័ក្តិ បានគាំទ្រទាំងស្រុងចំពោះគម្រោងវិនិយោគនេះ ហើយបានណែនាំដល់មន្ត្រីជំនាញ ធ្វើការសម្របសម្រួល និងដោះស្រាយបញ្ហាផ្សេងៗ ដើម្បីឲ្យគម្រោងនេះដំណើរការទៅដោយរលូន។
បើតាមរបាយការណ៍ពីសភាពាណិជ្ជកម្មអឺរ៉ុបប្រចាំនៅកម្ពុជា បានបង្ហាញឲ្យដឹងថា កាលពីឆ្នាំ ២០១៧ កម្ពុជាបានផលិត និងដំឡើងកង់ នាំចេញទៅកាន់ទីផ្សារពិភពលោកចំនួនជាង ១,៨លានគ្រឿង គិតជាទឹកប្រាក់ស្មើនឹង ៣៦១លានដុល្លារ គឺបានកើនឡើង ២៩% បើធៀបនឹងឆ្នាំ២០១៦។
តំបន់សេដ្ឋកិច្ចពិសេសក្រុងបាវិត ខេត្តស្វាយរៀង ជិតព្រំប្រទល់ព្រំដែនកម្ពុជា និងវៀតណាម គឺជាទីតាំងផលិត និងដំឡើងកង់ធំបំផុតរបស់កម្ពុជា៕
